రాష్ట్రం/స్థానికం ప్రతినిధి

రాష్ట్రంలో మున్సిపల్ ఎన్నికల నిర్వహణకు ముహూర్తం ఖరారైనట్లు సంకేతాలు వెలువడుతున్నాయి. గడువు ముగిసిన 117 మున్సిపాలిటీ పాలకవర్గాలకు ఎన్నికలు నిర్వహించాలన్న నిర్ణయానికి ప్రభుత్వం ఇప్పటికే వచ్చిన నేపథ్యంలో, ఈ నెలలోనే నోటిఫికేషన్ విడుదలయ్యే అవకాశం ఉందని సమాచారం.

పురపాలక, పట్టణాభివృద్ధి శాఖ ఎన్నికల నిర్వహణకు సిద్ధమవుతుండగా, రాష్ట్ర ఎన్నికల కమిషన్‌తో కలిసి కసరత్తు ప్రారంభించింది. ఈ నెల 11 లేదా 20వ తేదీలోగా ఎన్నికల నోటిఫికేషన్ విడుదలయ్యే అవకాశముందని అధికార వర్గాలు చెబుతున్నాయి.

ఇప్పటికే జనవరి 1న ముసాయిదా ఓటర్ల జాబితాను ఎన్నికల సంఘం ప్రకటించింది. ఈ నెల 10న తుది ఓటర్ల జాబితా వెలువడనుంది. దీంతో 11న నోటిఫికేషన్ విడుదలకు మార్గం సుగమమవుతుందని అంచనా. అయితే సంక్రాంతి పండగ, వరుస సెలవుల కారణంగా ప్రక్రియ ఆలస్యమైతే ఈ నెల 20న నోటిఫికేషన్ జారీ చేసే అవకాశం ఉందని తెలుస్తోంది.

నోటిఫికేషన్ విడుదలైన వెంటనే నామినేషన్లు, ఉపసంహరణ, ప్రచారం తదితర ఎన్నికల ప్రక్రియలు వేగంగా సాగనున్నాయి. మొత్తం మీద 117 మున్సిపాలిటీల్లో ఎన్నికల వాతావరణం వేడెక్కే సూచనలు కనిపిస్తున్నాయి.