ప్రపంచ మానవ అక్రమ రవాణా వ్యతిరేక దినోత్సవాన్ని పురస్కరించుకొని మహిళా శిశు సంక్షేమ శాఖ, సంగారెడ్డి జిల్లా ఆధ్వర్యంలో ఎద్దుమైలారంలోని పీఎంసీ కేంద్రీయ విద్యాలయం, ఆర్డినెన్స్ ఫ్యాక్టరీ ప్రాంగణంలో విద్యార్థులు, ఉపాధ్యాయులు, సిబ్బందికి అవగాహన కార్యక్రమం నిర్వహించారు. ఈ సందర్భంగా జిల్లా మహిళా సంక్షేమ శాఖ అధికారి లలితా కుమారి మాట్లాడుతూ మానవ అక్రమ రవాణా సమాజానికి అత్యంత ప్రమాదకరమైన నేరమని, ఉద్యోగాలు, ఉన్నత విద్య, వివాహం, విదేశీ ఉపాధి పేరుతో అమాయకులను మోసం చేసి అక్రమ రవాణాకు గురిచేస్తున్న ఘటనలు పెరుగుతున్నాయని తెలిపారు. ముఖ్యంగా చిన్నారులు, మహిళలు, ఆర్థికంగా వెనుకబడిన కుటుంబాలకు చెందిన వారు ఇలాంటి మోసాలకు ఎక్కువగా గురవుతున్నారని చెప్పారు. మానవ అక్రమ రవాణా వల్ల బాల కార్మికత్వం, బాల్య వివాహాలు, బలవంతపు శ్రమ, లైంగిక దోపిడీ, బిచ్చాటన, అవయవాల అక్రమ వ్యాపారం వంటి నేరాలు పెరుగుతున్నాయని, అనుమానాస్పద సంఘటనలు గమనిస్తే వెంటనే పోలీసు శాఖ లేదా సంబంధిత ప్రభుత్వ అధికారులకు సమాచారం అందించాలని సూచించారు. విద్యార్థులు అపరిచితులను నమ్మకుండా సోషల్ మీడియాలో వచ్చే తప్పుడు ఉద్యోగాలు, స్కాలర్‌షిప్‌లు, విదేశీ ఉపాధి ఆఫర్ల పట్ల అప్రమత్తంగా ఉండాలని, తల్లిదండ్రులు కూడా పిల్లల భద్రత, చదువు, ఆన్‌లైన్ వినియోగంపై ప్రత్యేక శ్రద్ధ వహించాలని కోరారు.జిల్లా బాలల రక్షణ అధికారి రత్నం మాట్లాడుతూ ప్రతి చిన్నారికి సురక్షితమైన బాల్యం హక్కు అని, పిల్లల హక్కుల పరిరక్షణలో ప్రతి ఒక్కరూ భాగస్వాములు కావాలని పిలుపునిచ్చారు. అనంతరం అధికారులు విద్యార్థులకు మానవ అక్రమ రవాణా నివారణ, బాలల హక్కులు, సురక్షిత జీవనం, అత్యవసర పరిస్థితుల్లో తీసుకోవాల్సిన జాగ్రత్తలపై అవగాహన కల్పించి ప్రతిజ్ఞ చేయించారు. కార్యక్రమం ముగింపులో అవగాహన కరపత్రాలను పంపిణీ చేశారు. ఈ కార్యక్రమంలో పాఠశాల ప్రిన్సిపాల్ భారతీ దేవి, డీసీపీయూ కోఆర్డినేటర్ కల్పన, సఖి చైల్డ్ లైన్ కోఆర్డినేటర్ యాదగిరి, జిల్లా సైన్స్ అధికారి పి. సిద్ధారెడ్డి, ఏహెచ్‌టీయూ ప్రతినిధులు మాణిక్ రెడ్డి, ఎండి అలీ, జిల్లా మహిళా సాధికారత కేంద్రం సిబ్బంది విశాల, నరసింహులు, ఉపాధ్యాయులు, సిబ్బంది, పెద్ద సంఖ్యలో విద్యార్థులు పాల్గొన్నారు.