‘మన రోడ్డు–మన భద్రత–మన బాధ్యత’ నినాదంతో LHPS ఉద్యమం

యాదాద్రి భువనగిరి స్థానికం ప్రధాన ప్రతినిధి

లంబాడి హక్కుల సాధన కోసం లంబాడి హక్కుల పోరాట సమితి (LHPS) ఆధ్వర్యంలో ఆమరణ నిరాహార దీక్షకు పిలుపునిచ్చారు. ‘మన రోడ్డు–మన భద్రత–మన బాధ్యత’ అనే నినాదంతో చేపట్టనున్న ఈ ఉద్యమం ఈ నెల 23 నుంచి ప్రారంభం కానుంది.

యాదాద్రి భువనగిరి జిల్లా పరిధిలోని గుండ్లగూడెం రైల్వేగేటు సమీపంలో శుక్రవారం నుంచి నిరవధిక నిరాహార దీక్ష చేపట్టనున్నట్లు LHPS నాయకులు ప్రకటించారు. రోడ్డు భద్రత సమస్యలపై ప్రభుత్వ దృష్టిని ఆకర్షించడంతో పాటు, లంబాడి తండాల ప్రజలకు న్యాయం చేయాలనే లక్ష్యంతో ఈ పోరాటాన్ని ప్రారంభిస్తున్నట్లు తెలిపారు.

ఈ ఉద్యమాన్ని విజయవంతం చేయాలని స్థానిక గ్రామాల నాయకులు, ప్రజలు, LHPS రాష్ట్ర, జిల్లా, మండల స్థాయి నాయకులు, సభ్యులు, అఖిలపక్ష పార్టీల ప్రతినిధులకు సమితి పిలుపునిచ్చింది. ప్రజల భద్రత, హక్కుల పరిరక్షణ కోసం అందరూ ఒక్కతాటిపైకి వచ్చి ఈ పోరాటానికి మద్దతు ఇవ్వాలని కోరారు.

లంబాడి సమాజానికి సంబంధించిన మౌలిక సమస్యల పరిష్కారానికి ఈ ఆమరణ నిరాహార దీక్ష ఒక కీలక మైలురాయిగా నిలవనుందని నాయకులు అభిప్రాయపడ్డారు.