కష్టపడే కార్మికుల సంక్షేమమే లక్ష్యం

పారిశుద్ధ్య కార్మికులకు కాస్మోటిక్స్ పంపిణీ చేసిన మున్సిపల్ కమిషనర్ జగ్జీవన్

స్థానిక ప్రతినిధి

నారాయణఖేడ్ పట్టణంలో పారిశుద్ధ్య పనులతో పట్టణాన్ని శుభ్రంగా ఉంచుతున్న కార్మికులకు మున్సిపల్ కమిషనర్ జగ్జీవన్ ఆత్మీయంగా చేయూత అందించారు. మున్సిపల్ కార్యాలయ ప్రాంగణంలో పనిచేస్తున్న పారిశుద్ధ్య కార్మికులకు కాస్మోటిక్స్ సామాగ్రిని పంపిణీ చేశారు.

ఈ సందర్భంగా కార్మికులకు సబ్బులు, సర్ఫ్‌లు, బెల్లం తదితర నిత్యావసర వస్తువులు అందజేశారు. అనంతరం కమిషనర్ మాట్లాడుతూ— పట్టణ పరిశుభ్రత కోసం నిరంతరం శ్రమించే కార్మికుల ఆరోగ్యం, పరిశుభ్రతపై ప్రత్యేక శ్రద్ధ తీసుకోవాల్సిన బాధ్యత మున్సిపాలిటీదేనని పేర్కొన్నారు.

పండుగలు, ప్రత్యేక సందర్భాల్లో పారిశుద్ధ్య కార్మికులకు అవసరమైన సామాగ్రిని అందించడం ఆనవాయితీగా కొనసాగుతోందని శానిటేషన్ ఇన్స్పెక్టర్ శ్రీనివాస్ తెలిపారు. కఠిన పరిస్థితుల్లో పని చేసే కార్మికులకు కాస్మోటిక్స్ వంటి అవసరమైన వస్తువులు తప్పనిసరిగా అందించాల్సిన అవసరం ఉందని, అందుకే ఈ కార్యక్రమం నిర్వహించినట్లు ఆయన వివరించారు.

ఈ కార్యక్రమంతో కార్మికుల్లో ఆనందం వెల్లివిరిసింది. తమ కష్టాన్ని గుర్తించి సహాయం చేసిన మున్సిపల్ అధికారులకు వారు కృతజ్ఞతలు తెలిపారు.