గోరంట్ల,: బాల్య వివాహాల నిర్మూలనపై ప్రజల్లో చైతన్యం కల్పించేందుకు శ్రీ సత్యసాయి జిల్లా బాలల సంరక్షణ విభాగం ఆధ్వర్యంలో గోరంట్ల పట్టణంలో బాలికా శక్తి చైతన్య ప్రచార రథం ద్వారా అవగాహన కార్యక్రమాలు నిర్వహించారు. జిల్లా కలెక్టర్ ఆదేశాలు, ప్రాజెక్ట్ డైరెక్టర్ ప్రమీల సూచనల మేరకు కొలిమి చింతమాను వీధి, పూలేరు రోడ్‌లోని సంచార జాతుల నివాస ప్రాంతం, ట్రైబల్ వెల్ఫేర్ గురుకుల పాఠశాలలో ఈ కార్యక్రమాలు చేపట్టారు.

ఈ సందర్భంగా తోలుబొమ్మలాట, ఎల్ఈడి ప్రదర్శనల ద్వారా బాల్య వివాహాల వల్ల కలిగే అనర్థాలు, బాల్య వివాహ నిషేధ చట్టం–2006, పిల్లలపై లైంగిక దాడుల నివారణకు సంబంధించిన చట్టాలు, గుడ్ టచ్–బ్యాడ్ టచ్ వంటి అంశాలపై విద్యార్థులు, ప్రజలకు అవగాహన కల్పించారు.

ఈ కార్యక్రమంలో గోరంట్ల ఎంపీడీఓ కమలాబాయి, ఎస్‌ఐ నిర్మల, ఐసీడీఎస్ సూపర్వైజర్ నాగరాణి, కౌన్సిలర్ శివలత, పాఠశాల ప్రధానోపాధ్యాయురాలు చంద్రకళ, రెడ్‌క్రాస్ సంస్థ వైస్ చైర్మన్ భక్త వత్సలం, ఉపాధ్యాయులు జగదీష్, పవన్, అంగన్‌వాడీ కార్యకర్తలు, విద్యార్థులు, స్థానిక ప్రజలు పాల్గొన్నారు.