చిట్యాల స్థానిక ప్రతినిధి కొమ్మిడాల మహేందర్ రెడ్డి

చిట్యాల మున్సిపాలిటీ :

చిట్యాల మున్సిపాలిటీ పరిధిలోని శివనేనిగూడెం వార్డులో ఏర్పాటు చేసిన డంపింగ్ యార్డును వెంటనే తరలించాలని కోరుతూ గ్రామస్థులు చేపట్టిన నిరసనకు నకిరేకల్ మాజీ ఎమ్మెల్యే చిరుమర్తి లింగయ్య మద్దతు ప్రకటించారు. స్థానికుల ఆందోళనకు సంఘీభావంగా నిరసన కార్యక్రమంలో పాల్గొని వారి సమస్యలను దగ్గరగా తెలుసుకున్నారు.

ఈ సందర్భంగా చిరుమర్తి లింగయ్య మాట్లాడుతూ, నివాస ప్రాంతాలకు సమీపంలో డంపింగ్ యార్డు ఏర్పాటు చేయడం ప్రజల ఆరోగ్యానికి ప్రమాదకరమని పేర్కొన్నారు. దుర్వాసన, వ్యర్థాల కారణంగా ప్రజలు అనేక ఇబ్బందులు ఎదుర్కొంటున్నారని, ముఖ్యంగా పిల్లలు, వృద్ధులు అనారోగ్యానికి గురయ్యే పరిస్థితి నెలకొందని ఆందోళన వ్యక్తం చేశారు.

ప్రజల అభిప్రాయాలను పరిగణలోకి తీసుకుని డంపింగ్ యార్డును ప్రత్యామ్నాయ ప్రాంతానికి తరలించేలా మున్సిపల్ అధికారులు తక్షణమే చర్యలు తీసుకోవాలని ఆయన డిమాండ్ చేశారు. సమస్య పరిష్కారం అయ్యే వరకు గ్రామస్థులతో కలిసి పోరాడుతామని భరోసా ఇచ్చారు