స్థానికం ప్రధాన ప్రతినిధి

భారత కమ్యూనిస్టు పార్టీ (సీపీఐ) వందేళ్ల ప్రస్థానాన్ని పురస్కరించుకుని ఈ నెల 18వ తేదీన తెలంగాణ రాష్ట్రం ఖమ్మం జిల్లాలో ఘనంగా నిర్వహించనున్న శత వసంతాల వేడుకలను విజయవంతం చేయాలని పార్టీ నాయకులు పిలుపునిచ్చారు. ఈ చారిత్రక కార్యక్రమానికి గ్రామ ప్రజలు పెద్ద సంఖ్యలో హాజరై జయప్రదం చేయాలని కోరారు.

పార్టీ ఆవిర్భావ దినోత్సవాన్ని పురస్కరించుకుని నాగనాథ్ హళ్లి గ్రామంలో సీపీఐ పార్టీ పతాకాన్ని గ్రామ కార్యదర్శి సిద్దలింగ గారు ఆవిష్కరించారు. ఈ సందర్భంగా జరిగిన సభలో సీపీఐ జిల్లా కార్యవర్గ సభ్యులు ఎస్. సుదర్శన్, మండల కార్యదర్శి కల్లుబావిరాజు పాల్గొని ప్రసంగించారు.

వక్తలు మాట్లాడుతూ, 1925 డిసెంబర్ 26న ఉత్తరప్రదేశ్ రాష్ట్రం కాన్పూర్‌లో ఆవిర్భవించిన సీపీఐ పార్టీకి నేటికి వందేళ్లు నిండాయని గుర్తు చేశారు. భారతదేశ సంపూర్ణ స్వాతంత్రం కోసం బ్రిటిష్ పాలకులపై అలుపెరగని పోరాటాలు సాగించిన ఘన చరిత్ర సీపీఐకే దక్కిందన్నారు. ప్రతి పేదవాడికి సాగు భూమి ఉండాలన్న లక్ష్యంతో పెత్తందారులపై పోరాటాలు చేసి భూ పంపిణీకి బాటలు వేసిన పార్టీగా సీపీఐ నిలిచిందని పేర్కొన్నారు.స్వాతంత్ర్య ఉద్యమంలో ఎలాంటి పాత్ర లేని ఆర్‌ఎస్‌ఎస్, బీజేపీ నాయకులు ప్రజల మధ్య మత ఘర్షణలు రెచ్చగొడుతూ దళితులు, పేదలు, బడుగు బలహీన వర్గాలపై దాడులకు పాల్పడుతున్నారని తీవ్రంగా విమర్శించారు. గ్రామాల్లో ఉపాధి లేక, తిండి దొరకని పరిస్థితుల్లో తల్లిదండ్రులు తమ పిల్లల చదువును వదిలి తట్టా–పుట్ట సర్దుకుని పక్క రాష్ట్రాలకు వలస వెళ్తున్నారని ఆవేదన వ్యక్తం చేశారు. ఈ పరిస్థితిని అరికట్టాల్సిన బాధ్యత ప్రభుత్వానిదేనని స్పష్టం చేశారు.

2005లో కమ్యూనిస్టుల పోరాట ఫలితంగా అమలులోకి వచ్చిన మహాత్మా గాంధీ జాతీయ గ్రామీణ ఉపాధి హామీ చట్టాన్ని నిర్వీర్యం చేసేలా కేంద్ర ప్రభుత్వం కార్పొరేట్ శక్తులతో చేతులు కలిపి కొత్త పథకాలను తెచ్చి ఉపాధి కార్మికుల కడుపులు కొడుతోందని ఆరోపించారు. అలాగే కూటమి ప్రభుత్వం అధికారంలోకి వచ్చి రెండేళ్లు గడుస్తున్నా గ్రామాల్లో ఇంటి స్థలాలుకేటాయించకపోవడం విడ్డూరమని అన్నారు. వృద్ధులు, వికలాంగులు, వితంతువులకు కొత్త పెన్షన్లు మంజూరు చేయాలని, గ్రామాభివృద్ధికి ప్రత్యేక నిధులు కేటాయించి మౌలిక వసతులు కల్పించాలని డిమాండ్ చేశారు.ఈ కార్యక్రమంలో గ్రామ నాయకులు శ్రీనివాసులు, గాదిలింగ, వెంకటేశులు, కారెప్ప తదితరులు పాల్గొన్నారు.

సీపీఐ శత వసంతాల వేడుకలు ప్రజా సమస్యల పరిష్కారానికి మరో మైలురాయిగా నిలవాలని నాయకులు ఆకాంక్షించారు