చిట్యాల పురపాలక పరిధిలో సోమవారం కామదహనం కార్యక్రమాలు భక్తి, శ్రద్ధల మధ్య ఘనంగా నిర్వహించనున్నారు. మంగళవారం జరగనున్న హోలీ పండుగను ప్రజలంతా ఆనందోత్సాహాలతో జరుపుకోవాలని ధూప దీప నైవేద్య అర్చక సంఘం రాష్ట్ర అధ్యక్షులు దౌలతాబాద్ వాసుదేవ శర్మ విజ్ఞప్తి చేశారు.ఈ సందర్భంగా ఆయన మాట్లాడుతూ, కామదహనం అనేది చెడు పై మంచి సాధించిన విజయానికి ప్రతీక అని పేర్కొన్నారు. సమాజంలో శాంతి, సౌహార్ద్రం, సోదరభావం పెంపొందించే పండుగగా హోలీకి ప్రత్యేక స్థానం ఉందన్నారు. రంగుల పండుగను పరస్పర గౌరవంతో, ఎలాంటి అపశృతి లేకుండా జరుపుకోవాలని సూచించారు.పురపాలక ప్రాంత ప్రజలందరూ కుటుంబ సభ్యులతో కలిసి సంప్రదాయ పద్ధతుల్లో పండుగను నిర్వహించాలని, యువత ప్రత్యేకంగా బాధ్యతాయుతంగా వ్యవహరించాలని కోరారు. భక్తి, ఆనందాల మధ్య హోలీ సంబరాలు చిట్యాలలో మరింత వైభవంగా నిలవాలని ఆశాభావం వ్యక్తం చేశారు.స్థానిక దేవాలయాల్లో ప్రత్యేక పూజా కార్యక్రమాలు, ధూప దీప నైవేద్యాలు నిర్వహించనున్నట్లు తెలిపారు. నగర ప్రజలు సామాజిక ఐక్యతను చాటుతూ పండుగను విజయవంతం చేయాలని పిలుపునిచ్చారు.