టీఎన్ శేషన్ చెప్పిన అనుభవం… ఉన్నత పదవులకూ మించిన మనుష్యత పాఠం

స్థానికం ప్రధాన ప్రతినిధి కొండ మల్లేశం గౌడ్

ఒక సందర్భంలో దేశ ప్రధాన ఎన్నికల కమిషనర్‌గా పనిచేసిన టీఎన్ శేషన్, భార్యతో కలిసి ఉత్తరప్రదేశ్‌లోని ఓ ప్రాంతానికి పిక్నిక్‌కు వెళ్తుండగా మార్గమధ్యంలో పిచ్చుక గూళ్లతో నిండిన పెద్ద మామిడి తోటను చూశారు. ఆ గూళ్లను చూసి ముచ్చటపడిన శేషన్ భార్య, రెండు గూళ్లను ఇంటికి తీసుకెళ్లాలనే ఆలోచన వ్యక్తం చేశారు.దగ్గర్లో ఆవులను మేపుతున్న ఓ యువకుడిని పిలిపించి, పిచ్చుక గూళ్లను తీసిస్తే డబ్బు ఇస్తామని పోలీసు ఎస్కార్ట్ ఆశ చూపింది. తొలుత 10 రూపాయలు, ఆ తర్వాత 50 రూపాయల వరకు ఆఫర్ పెరిగింది. పోలీసుల ఆదేశాలు ఉన్నప్పటికీ ఆ యువకుడు మాత్రం గూళ్లను తీయడానికి నిరాకరించాడు.

“మీరు ఎంత డబ్బు ఇచ్చినా గూళ్లను తీసి ఇవ్వలేను. ఆ గూళ్లలో ఉన్న పిల్ల పిచ్చుకల పరిస్థితి ఏమవుతుంది? సాయంత్రం తల్లి పిచ్చుక ఆహారం తెచ్చుకుని వచ్చి పిల్లలు కనిపించకపోతే ఆమె పడే బాధ ఎవరు భరిస్తారు?” అని ఆ యువకుడు ప్రశ్నించాడు.

ఈ మాటలు విన్న శేషన్ దంపతులు ఒక్కసారిగా షాక్‌కు గురయ్యారు. అనంతరం ఈ సంఘటనను గుర్తు చేసుకుంటూ టీఎన్ శేషన్ మాట్లాడుతూ,

“నా పదవి, నా హోదా, నా చదువు, నా ఐఏఎస్ అన్నీ కూడా ఆ ఆవులను కాసే యువకుడి విజ్ఞత ముందు చిన్నబోయాయి. విద్య, స్థానం, సామాజిక హోదా అన్నవి మానవత్వం ముందు నిలబడలేవు. ఈ సంఘటన మమ్మల్ని రోజులు తరబడి అపరాధభావంతో వెంటాడింది” అని పేర్కొన్నారు.పదవులు, కుర్చీలు మనిషికి గౌరవం తీసుకురావు… మనిషి వ్యక్తిత్వం, విజ్ఞత వల్లే ఆ పదవికే గౌరవం వస్తుందన్న సత్యాన్ని ఈ సంఘటన స్పష్టం చేస్తుందని శేషన్ వ్యాఖ్యానించారు. ఉన్నత స్థాయిలో ఉన్నవారు సమాజానికి ఉపయోగపడేలా ఆలోచించాలి, మానవత్వంతో నిర్ణయాలు తీసుకోవాలే గానీ, అహంకారంతో ప్రవర్తించడం మూర్ఖత్వమేనని స్పష్టం చేశారు.మేనేజ్‌మెంట్ సెమినార్‌లో విద్యార్థులతో పంచుకున్న ఈ అనుభవం, చదువుకంటే మించిన విలువలు ఉన్నాయనే విషయాన్ని గుర్తుచేసే గొప్ప జీవిత పాఠంగా నిలిచింది.