తుంగతుర్తిమండల పరిధిలోని అన్నారం గ్రామంలో ప్రీ ప్రైమరీ స్కూల్ ఏర్పాటు చేయాలని కోరుతూ శుక్రవారం హైదరాబాద్ లోని డైరెక్టర్ ఆఫ్ స్కూల్ ఎడ్యుకేషన్ సంచాలకులు డాక్టర్ నవీన్ నికోలాస్ ను సర్పంచ్ కుంచాల శ్రీనివాస్ రెడ్డి కలిసి వినతి పత్రం అందించారు. ఈ సందర్భంగా ఆయన మాట్లాడుతూ... గ్రామంలో దాదాపు 4వేల మంది జనాభా ఉన్నారని, రెండు ప్రాథమిక పాఠశాలలు, ఒక జడ్పీహెచ్ఎస్ పాఠశాల, 5 అంగన్వాడి కేంద్రాలు ఉన్నాయని, గ్రామంలో ప్రీ ప్రైమరీ విద్య లేకపోవడం వలన దాదాపు 70 మంది విద్యార్థులు 7 కిలోమీటర్ల దూరంలో ఉన్న తుంగతుర్తి ప్రైవేట్ పాఠశాలలకు వెళ్లి ఆర్థిక ఇబ్బందులు పడుతున్నారని ఆయన తెలిపారు. మా గ్రామంలో ప్రీ ప్రైమరీ విద్యను స్థాపించినట్లయితే ప్రాథమిక విద్య బలోపేతమై నాణ్యమైన విద్య పొందడానికి కృషి చేస్తామన్నారు. గ్రామ ప్రజలకు ఫీజుల భారం లేకుండా ఉచిత ప్రాథమిక విద్యను వారి పిల్లలకు అందించాలని కోరారు.