స్థానికం ప్రధాన ప్రతినిధి

రాజ్యాంగ నిర్మాత డాక్టర్ బి.ఆర్ అంబేద్కర్ ఆశించిన సమానత్వ సమాజాన్ని సాకారం చేయడమే లక్ష్యంగా అంబేద్కర్ సార్వత్రిక విశ్వవిద్యాలయం ముందడుగు వేస్తోందని వైస్ ఛాన్సలర్ ప్రొఫెసర్ ఘంటా చక్రపాణి స్పష్టం చేశారు.విశ్వవిద్యాలయ ప్రాంగణంలో నిర్వహించిన 77వ గణతంత్ర దినోత్సవ వేడుకల్లో ఆయన జాతీయ పతాకాన్ని ఆవిష్కరించి ప్రసంగించారు. ఈ సందర్భంగా విద్యార్థులు, ఉద్యోగులకు గణతంత్ర దినోత్సవ శుభాకాంక్షలు తెలిపారు.వచ్చే విద్యా సంవత్సరంలో విశ్వవిద్యాలయంలో వ్యవసాయ ఆధారిత వృత్తి నైపుణ్య కోర్సులను ప్రారంభించనున్నట్లు వీసీ ప్రకటించారు. గ్రామీణ తెలంగాణ విద్యార్థులు, రైతులకు ఉపయోగపడేలా ఈ కోర్సులను ప్రత్యేకంగా రూపొందిస్తున్నామని తెలిపారు. విద్యతో పాటు ఉపాధి లక్ష్యంగా ఈ కార్యక్రమాలు అమలవుతాయని చెప్పారు.

విశ్వవిద్యాలయంలో చేరే విద్యార్థులను మొదటి సెమిస్టర్ నుంచే సాంకేతిక పరిజ్ఞానం, వృత్తి నైపుణ్యాలు, సామాజిక బాధ్యతలతో తీర్చిదిద్దుతున్నామని పేర్కొన్నారు. దేశ విదేశాల్లోని సంస్థల్లో అవకాశాలు అందిపుచ్చుకునేలా పాఠ్యాంశాలను రూపొందించినట్లు వెల్లడించారు.అనంతరం రిజిస్ట్రార్ డాక్టర్ యల్. విజయ కృష్ణ రెడ్డి నాన్-టీచింగ్ ఉద్యోగ సంఘ కార్యాలయం వద్ద జాతీయ పతాకాన్ని ఆవిష్కరించారు. యూనివర్సిటీ ఉద్యోగులు విద్యార్థులకు మరింత మెరుగైన సేవలు అందించేందుకు అంకితభావంతో పనిచేయాలని ఆయన సూచించారు.ఈ కార్యక్రమంలో ప్రొఫెసర్ పుష్పా చక్రపాణి, ప్రొఫెసర్ ఆనంద్ పవార్, ప్రొఫెసర్ రబింద్రనాథ్ సోలమన్, ప్రొఫెసర్ పల్లవి కాబడే, డాక్టర్ వెంకటేశ్వర్లు, ప్రొఫెసర్ శ్రీదేవి, ప్రొఫెసర్ వడ్డాణం శ్రీనివాస్‌తో పాటు డైరెక్టర్లు, డీన్లు, బోధన-బోధనేతర సిబ్బంది, ఉద్యోగ సంఘాల నాయకులు పాల్గొన్నారు.