సంగారెడ్డి మహిళా డిగ్రీ కళాశాలలో ఏప్రిల్ 10న వార్షికోత్సవ వేడుకలు ఘనంగా నిర్వహించారు. స్థానిక ప్రతినిధి వివరాల ప్రకారం కళాశాల ప్రిన్సిపల్ అరుణ బాయ్ అధ్యక్షత వహించగా మునిసిపల్ చైర్‌పర్సన్ కూన వనిత సంతోష్ ముఖ్య అతిథిగా, జిల్లా అగ్నిమాపక శాఖ అధికారి నాగేశ్వరరావు విశిష్ట అతిథిగా పాల్గొన్నారు. కార్యక్రమంలో అరుణ బాయ్ వార్షిక నివేదికను సమర్పిస్తూ ఈ విద్యా సంవత్సరంలో కళాశాల సాధించిన పురోగతి, అధ్యాపకులు మరియు విద్యార్థుల విజయాలను వివరించారు. సీపీగెట్ 2025లో వృక్షశాస్త్ర విభాగం నుండి మొదటి స్థానం సాధించిన విద్యార్థిని అఖిలను ప్రత్యేకంగా సన్మానించారు. రాజేష్ కుమార్ ప్రిన్సిపల్ ప్రొఫెసర్‌గా పదోన్నతి పొందడం, సుప్రభా మరియు మరో అధ్యాపకుడు పీహెచ్‌డీ పట్టాలు పొందడం వంటి విజయాలను ప్రస్తావించారు. కళాశాల అభివృద్ధికి జిల్లా కలెక్టర్ ప్రావీణ్య మరమ్మతుల కోసం సుమారు ఎనిమిది లక్షల ముప్పై వేల రూపాయలు కేటాయించగా, నిర్మల జగ్గారెడ్డి తమ నిధుల నుండి నాలుగు కోట్ల రూపాయలు వసతి గృహ నిర్మాణానికి మంజూరు చేసినట్లు తెలిపారు. ఈ సందర్భంగా వనిత సంతోష్ మాట్లాడుతూ ఆడపిల్లల ఉన్నత విద్య సమాజ ప్రగతికి ఎంతో అవసరమని పేర్కొనగా, నాగేశ్వరరావు విద్యార్థినులు డిగ్రీ అనంతరం గ్రూపు పరీక్షలు రాసి ఉన్నత స్థాయికి చేరాలని సూచించారు. కార్యక్రమంలో అధ్యాపకులు, విద్యార్థులు పెద్ద సంఖ్యలో పాల్గొని వేడుకలను విజయవంతం చేశారు.