చౌటుప్పల్ మండలంలోని చిన్న కొండూరు గ్రామంలో కాంగ్రెస్ పార్టీ గ్రామ శాఖ అధ్యక్షుడిగా సీనియర్ నాయకుడు బక్క మల్లయ్యను ఏకగ్రీవంగా ఎన్నుకున్నారు.ఈ సందర్భంగా బక్క మల్లయ్య మాట్లాడుతూ, గత 35 సంవత్సరాలుగా కాంగ్రెస్ పార్టీ కోసం అహర్నిశలు కృషి చేస్తున్నానని తెలిపారు. ఒకసారి వార్డ్ సభ్యునిగా పార్టీ అవకాశం కల్పించిందని, మళ్లీ తనపై నమ్మకంతో అధ్యక్షుడిగా ఎన్నుకున్నందుకు కృతజ్ఞతలు తెలిపారు.తన ఎన్నికకు సహకరించిన గ్రామ సర్పంచ్ తిగుళ్ల చంద్రయ్య, ఉపసర్పంచ్ గడ్డం సత్తయ్య, మాజీ సర్పంచులు, మాజీ గ్రామ శాఖ అధ్యక్షులు, వార్డు సభ్యులు, కాంగ్రెస్ పార్టీ సీనియర్ నాయకులు, కార్యకర్తలకు ధన్యవాదాలు తెలిపారు. గ్రామంలో కాంగ్రెస్ పార్టీని మరింత బలోపేతం చేయడానికి కృషి చేస్తానని, మునుగోడు ఎమ్మెల్యే రాజగోపాల్ రెడ్డి సహకారంతో గ్రామాన్ని అభివృద్ధి పథంలో నడిపిస్తానని పేర్కొన్నారు. కష్టపడిన ప్రతి కార్యకర్తకు తగిన గుర్తింపు, పదవులు వచ్చేలా మండల శాఖకు ప్రతిపాదనలు చేస్తానన్నారు.ఈ కార్యక్రమంలో కాంగ్రెస్ పార్టీ నాయకులు, కార్యకర్తలు పాల్గొన్నారు.