తక్కువ డోస్ అవసరమైతే టాబ్లెట్లను రెండు ముక్కలుగా చేసి వాడటం చాలామంది చేస్తుంటారు. అయితే అన్ని మందులనూ ఇలా విరగొట్టడం ప్రమాదకరమని వైద్య నిపుణులు హెచ్చరిస్తున్నారు.

‘స్కోర్ లైన్’ (మధ్యలో గీత) ఉన్న టాబ్లెట్‌లను మాత్రమే అవసరమైతే విరగొట్టాలి. ఆ గీత ప్రత్యేకంగా సమాన మోతాదుగా విడగొట్టేందుకు తయారీ సమయంలోనే ఇస్తారు. గీత లేని టాబ్లెట్‌ను విరగొడితే మందు మోతాదు అసమానంగా మారి చికిత్స ప్రభావం తగ్గే అవకాశం ఉంది.

ప్రత్యేకంగా ఎంటరిక్ కోటింగ్ ఉన్న టాబ్లెట్‌లను అస్సలు విరగొట్టకూడదు. ఈ కోటింగ్ వల్ల మందు కడుపులో కరగకుండా నేరుగా పేగుల్లోకి వెళ్లి అక్కడే కరిగేలా చేస్తుంది. అలాంటి టాబ్లెట్‌ను విరగొడితే కోటింగ్ దెబ్బతిని కడుపులోనే కరిగి గ్యాస్ట్రిక్ సమస్యలు కలిగించవచ్చు.

అందుకే గీత లేని టాబ్లెట్‌లను స్వయంగా విరగొట్టకుండా, తక్కువ మోతాదు అవసరమైతే వైద్యుడిని సంప్రదించడం మంచిదని నిపుణులు సూచిస్తున్నారు.