తెలంగాణ రాష్ట్ర వ్యవసాయ శాఖ మంత్రి తుమ్మల నాగేశ్వరరావు దుబాయ్‌లో నిలిచిపోయినట్లు సమాచారం. పశ్చిమాసియా ప్రాంతంలో నెలకొన్న ఉద్రిక్త పరిస్థితుల నేపథ్యంలో దుబాయ్ ఇంటర్నేషనల్ ఎయిర్పోర్ట్ పై దాడులు జరగడంతో అక్కడి ప్రభుత్వం విమాన రాకపోకలను పూర్తిగా నిలిపివేసింది.

కుటుంబ సభ్యుడి వైద్యం కోసం ప్రయాణం

మంత్రి ఐదు రోజుల క్రితం తన కుటుంబ సభ్యుడి అనారోగ్యం కారణంగా మెరుగైన వైద్యం కోసం దుబాయ్‌కు వెళ్లారు. వైద్యం పూర్తయిన తరువాత స్వదేశానికి రావాల్సి ఉండగా, ఈలోపే పరిస్థితులు ఉద్రిక్తంగా మారాయి.

విమానాల రాకపోకలు నిలిపివేత

విమానాశ్రయంపై దాడులు జరగడంతో భద్రతా కారణాల దృష్ట్యా అన్ని విమానాల రాకపోకలను అధికారులు నిలిపివేశారు. పరిస్థితులు సాధారణ స్థితికి చేరుకున్న తర్వాతనే సేవలు పునఃప్రారంభం అయ్యే అవకాశం ఉందని సమాచారం.

ప్రస్తుతం మంత్రి మరియు ఆయన కుటుంబ సభ్యులు దుబాయ్‌లోనే ఉన్నట్లు తెలిసింది. పరిస్థితులు సద్దుమణిగిన వెంటనే తిరుగు ప్రయాణం చేయనున్నట్లు వర్గాలు వెల్లడించాయి.