యూరప్‌లోని చిన్న దేశం లిక్తెన్‌స్టెయిన్ పరిమాణంలో చిన్నదైనా విశేషాల్లో ప్రపంచాన్ని ఆశ్చర్యపరుస్తోంది. ఒకవైపు స్విట్జర్లాండ్, మరోవైపు ఆస్ట్రియా మధ్య అప్పర్ రైన్ వ్యాలీలో ఉన్న ఈ దేశం ప్రపంచంలోనే అత్యంత సంపన్న దేశాల్లో ఒకటిగా గుర్తింపు పొందింది.

లిక్తెన్‌స్టెయిన్ రాజధాని వదుజ్కు నేరుగా విమాన ప్రయాణం సాధ్యం కాదు. ఈ దేశానికి అంతర్జాతీయ విమానాశ్రయం లేకపోవడంతో పర్యాటకులు ముందుగా స్విట్జర్లాండ్‌లోని జ్యూరిచ్ విమానాశ్రయంకు చేరుకుని అక్కడి నుంచి రైలు లేదా రహదారి మార్గంలో ప్రయాణించాల్సి ఉంటుంది.

ఇంత ధనిక దేశమైనప్పటికీ వీరికి సొంత కరెన్సీ లేదు. స్విట్జర్లాండ్‌తో ఉన్న ఒప్పందం ప్రకారం స్విస్ ఫ్రాంక్నే అధికారిక కరెన్సీగా వినియోగిస్తున్నారు. దేశంలో పౌరుల కంటే రిజిస్టర్ అయిన కంపెనీలు ఎక్కువగా ఉండటం విశేషం.

ట్రాఫిక్ రద్దీ లేకుండా, నేరాల రేటు తక్కువగా, ప్రశాంత జీవనశైలితో ఈ దేశం ప్రత్యేకతను సొంతం చేసుకుంది. 1868 నుంచే సైన్యం కూడా లేకపోవడం మరో ప్రత్యేకత. విమానాశ్రయం, సొంత కరెన్సీ, సైన్యం లాంటి వ్యవస్థలు లేకపోయినా అభివృద్ధి సాధ్యమేనని లిక్తెన్‌స్టెయిన్ నిరూపిస్తోంది.