యుద్ధం నిలిపివేతపై అనుమానాలు

న్యూఢిల్లీ, మార్చి 12: పశ్చిమాసియాలో కొనసాగుతున్న ఉద్రిక్త పరిస్థితుల మధ్య యుద్ధాన్ని ఆపేందుకు ఇరాన్ పెట్టిన షరతులు అమలు సాధ్యమా అనే అంశంపై అంతర్జాతీయ వేదికల్లో చర్చలు సాగుతున్నాయి.ఇరాన్‌లో పాలన మార్పు చేయడం, అణు సామర్థ్యాన్ని పూర్తిగా నిర్వీర్యం చేయడమే లక్ష్యంగా ఇజ్రాయెల్ మరియు అమెరికా యుద్ధ చర్యలు ప్రారంభించాయని విశ్లేషకులు పేర్కొంటున్నారు. ఈ పరిస్థితుల్లో ఇరాన్ సార్వభౌమ హక్కులను గుర్తించి భద్రతకు హామీ ఇవ్వడం ఆ దేశాలకు సాధ్యం కాదని నిపుణులు అభిప్రాయపడుతున్నారు.యుద్ధంలో జరిగిన నష్టాలకు పరిహారం చెల్లించాలన్న ఇరాన్ డిమాండ్‌ను కూడా అగ్రరాజ్యం అంగీకరించే అవకాశాలు తక్కువగా ఉన్నాయని వారు చెబుతున్నారు.ఈ నేపథ్యంలో ఇరాన్ ప్రతిపాదించిన షరతులు అమలయ్యే అవకాశం కనిపించకపోవడంతో యుద్ధం త్వరగా ముగిసే అవకాశాలు తగ్గాయని అంతర్జాతీయ వ్యవహారాల నిపుణులు అంచనా వేస్తున్నారు. దీంతో ఈ ఘర్షణ మరికొంతకాలం కొనసాగవచ్చని భావిస్తున్నారు.