సుంకాలు విధించే అధికారం లేదని అమెరికా అత్యున్నత న్యాయస్థానం సంచలన తీర్పు

వసూలు చేసిన అదనపు పన్నులు తిరిగి చెల్లించాలని ఆదేశం

వాషింగ్టన్: అమెరికా అధ్యక్షుడు డొనాల్డ్ ట్రంప్ విధించిన సుంకాలను అమెరికా అత్యున్నత న్యాయస్థానం చట్టవిరుద్ధమని ప్రకటించింది. సుంకాలు విధించే అధికారం అధ్యక్షుడికి లేదని స్పష్టంచేస్తూ కీలక తీర్పు వెలువరించింది. ప్రపంచవ్యాప్తంగా పలు దేశాలపై విధించిన సుంకాలు రాజ్యాంగ విరుద్ధమని న్యాయస్థానం తేల్చింది. జాతీయ అత్యవసర పరిస్థితుల పేరుతో అమలు చేసిన విస్తృత వాణిజ్య చర్యలను సమర్థించేందుకు అత్యవసర అధికారాలను వినియోగించడం సరికాదని పేర్కొంది. అధ్యక్షుడు తన అధికార పరిధిని అధిగమించారని వ్యాఖ్యానించింది. ఇప్పటివరకు ప్రభుత్వం వసూలు చేసిన అదనపు పన్నులను సంబంధిత దేశాలకు తిరిగి చెల్లించాలని ఆదేశించింది. జాతీయ అత్యవసర పరిస్థితుల కోసం రూపొందించిన చట్టాలను దుర్వినియోగం చేస్తూ సుంకాలు విధించారని న్యాయస్థానం స్పష్టం చేసింది. అమెరికా రాజ్యాంగం ప్రకారం పన్నులు, సుంకాలు విధించే అధికారం అధ్యక్షుడికి కాకుండా పార్లమెంట్‌కు చెందుతుందని తీర్పులో వెల్లడించింది. సుంకాలను ఆర్థిక, విదేశాంగ విధానాలలో కీలక సాధనంగా వినియోగించిన నేపథ్యంలో ఈ తీర్పు ప్రాధాన్యం సంతరించుకుంది. ఈ తీర్పుతో ట్రంప్‌కు గట్టి ఎదురుదెబ్బ తగిలినట్లు రాజకీయ వర్గాలు భావిస్తున్నాయి.