చిన్నకాపర్తిలో యోగా, ధ్యానంపై అవగాహన.

నేటి ఉరుకుల పరుగుల జీవితంలో ఒత్తిడిని అధిగమించి, శారీరక, మానసిక ఆరోగ్యాన్ని కాపాడుకునేందుకు యోగా, ధ్యానం దోహదపడతాయని పలువురు పేర్కొన్నారు. నల్లగొండ జిల్లా చిట్యాల మండలం చిన్నకాపర్తి గ్రామంలో ఆదివారం రైతు వేదిక వద్ద యోగా, ధ్యాన కార్యక్రమాలపై అవగాహన కల్పించారు. ఈ సందర్భంగా గ్రామ సర్పంచ్ ఆవుల సుందర్ యాదవ్, మండల అధ్యక్షుడు జడల చిన్న మల్లయ్య కార్యక్రమానికి సంబంధించిన కరపత్రాలను విడుదల చేశారు.

ఈ సందర్భంగా పల్లపు బుద్ధుడు మాట్లాడుతూ.. ‘ప్రతి ఇంటికీ యోగా.. ప్రతి ఒక్కరికీ ఆరోగ్యం’ అనే లక్ష్యంతో గ్రామ ప్రజలు, యువకులు, విద్యార్థులకు యోగా ఆసనాలు, ధ్యానంపై అవగాహన కల్పించనున్నట్లు తెలిపారు. ‘హర్ ఘర్ ధ్యాన్’, ‘జీవించడం ఒక కళ’ కార్యక్రమాల ద్వారా ఒత్తిడిని తగ్గించుకోవడంతో పాటు జీవనశైలిలో సానుకూల మార్పులు తీసుకురావచ్చన్నారు. ఆర్ట్ ఆఫ్ లివింగ్ కోర్సులో భాగంగా శ్వాస ప్రక్రియలు, ధ్యానం, సుదర్శన క్రియ సాధనతో మానసిక ప్రశాంతత, శారీరక ఉల్లాసం పెంపొందించుకోవచ్చని వివరించారు. యోగా, ధ్యానాన్ని నిత్యజీవితంలో భాగం చేసుకోవాలని సూచించారు.

ఈ కార్యక్రమంలో చిట్యాల వ్యవసాయ మార్కెట్ కమిటీ డైరెక్టర్ కోనేటి యాదగిరి, పీఏసీఎస్ చైర్మన్ ఏనుగు రఘుమారెడ్డి, అద్దెల లింగారెడ్డి, బెల్లంకొండ రఘు, ఆవుల రమేష్, మెట్టు నాగశంకర్, వలిగొండ సత్యనారాయణ, నరసింహ, ప్రశాంత్, అశోక్, వెంకన్న, దివాకర్, లింగయ్య, శంకరయ్య, రమేష్, వెంకటేష్, పరమేష్ తదితరులు పాల్గొన్నారు.