అన్ని ఆర్టీసీ బస్సుల్లో ఉచిత ప్రయాణం కల్పించాలి.. 8న బస్సు భవన్‌ ఎదుట ధర్నా

రామన్నపేట: వికలాంగులకు ఇచ్చిన హామీని ప్రభుత్వం వెంటనే అమలు చేయాలని వికలాంగుల హక్కుల జాతీయ వేదిక (ఎన్‌పీఆర్‌డీ) యాదాద్రి భువనగిరి జిల్లా ప్రధాన కార్యదర్శి వనం ఉపేందర్‌ డిమాండ్‌ చేశారు. గ్రేటర్‌ హైదరాబాద్‌ పరిధిలో నడిచే ఆర్టీసీ బస్సుల్లో వికలాంగుల పాసులకు అనుమతి ఇవ్వాలని కోరారు. సమస్యల పరిష్కారం కోసం అక్టోబర్‌ 8న హైదరాబాద్‌లోని బస్సు భవన్‌ ఎదుట ధర్నా నిర్వహించనున్నట్లు తెలిపారు.

రామన్నపేట మండలం నిదానపల్లి గ్రామంలో ఎన్‌పీఆర్‌డీ గ్రామ కమిటీ ఆధ్వర్యంలో ధర్నాకు సంబంధించిన పోస్టర్‌ను ఆవిష్కరించారు. ఈ సందర్భంగా వనం ఉపేందర్‌ మాట్లాడుతూ.. 2023 అసెంబ్లీ ఎన్నికల సమయంలో కాంగ్రెస్‌ పార్టీ వికలాంగులకు ఆర్టీసీ బస్సుల్లో ఉచిత ప్రయాణ సౌకర్యం కల్పిస్తామని హామీ ఇచ్చిందన్నారు. ప్రభుత్వం ఏర్పడి 34 నెలలు పూర్తవుతున్నా హామీ అమలుకు నోచుకోలేదని తెలిపారు.

పాసు ఉన్నా ప్రయాణానికి పరిమితులా?

జిల్లా స్థాయిలో డీలక్స్‌ బస్సుల్లో వికలాంగుల రాయితీ పాసులను అనుమతిస్తున్నారని, గ్రేటర్‌ హైదరాబాద్‌ పరిధిలో మాత్రం ఎక్స్‌ప్రెస్, డీలక్స్‌ బస్సుల్లో పాసులను అనుమతించడం లేదని ఉపేందర్‌ పేర్కొన్నారు. ఆర్డినరీ బస్సులు తక్కువ సంఖ్యలో తిరుగుతున్న నేపథ్యంలో వికలాంగులు తమ గమ్యస్థానాలకు చేరుకోవడంలో ఇబ్బందులు పడుతున్నారని అన్నారు. గ్రేటర్‌ పరిధిలో నడిచే ఆర్డినరీ, ఎక్స్‌ప్రెస్, డీలక్స్‌.. అన్ని రకాల బస్సుల్లో వికలాంగుల పాసులను అనుమతించాలని డిమాండ్‌ చేశారు.

హామీ అమలు చేయాల్సిందే

ఎన్నికల సమయంలో ఇచ్చిన హామీని అమలు చేయాలని కోరుతూ వికలాంగులు 34 నెలలుగా ఆందోళనలు చేస్తున్నా ప్రభుత్వం స్పందించకపోవడం సరికాదన్నారు. వికలాంగులకు ఆర్టీసీలో ఉచిత ప్రయాణ సౌకర్యం కల్పించడంతోపాటు గ్రేటర్‌ పరిధిలో అన్ని రకాల బస్సుల్లో పాసులను అనుమతించాలని కోరారు.

అక్టోబర్‌ 8న హైదరాబాద్‌లోని బస్సు భవన్‌ ఎదుట నిర్వహించే ధర్నాకు జిల్లా వ్యాప్తంగా వికలాంగులు పెద్ద సంఖ్యలో తరలివచ్చి తమ హక్కుల కోసం గళమెత్తాలని పిలుపునిచ్చారు.

కార్యక్రమంలో నిదానపల్లి గ్రామ అధ్యక్షుడు బొడ్డుపల్లి అంజయ్య, ప్రధాన కార్యదర్శి భాషబోయిన యాదయ్య, ఉపాధ్యక్షుడు భాషబోయిన ప్రభుదాస్, చల్ల నాగార్జున, వంగాల రాజు, వీరమల్ల శీను, వర్గాల స్వామి, నారప్పక శ్యామసుందర్, ఆగుల లచ్చమ్మ, వి.జానమ్మ, ఏ.లక్ష్మయ్య, వి.పద్మ తదితరులు పాల్గొన్నారు.