వలిగొండ మండల కేంద్రంలో ఆహార భద్రత ప్రమాణాల అమలుపై అధికారులు శుక్రవారం ప్రత్యేక తనిఖీలు నిర్వహించారు. అసిస్టెంట్ ఫుడ్ కంట్రోలర్ వి. జ్యోతిర్మయి ఆదేశాల మేరకు యాదాద్రి భువనగిరి జిల్లా ఇన్‌చార్జి ఫుడ్ సేఫ్టీ ఆఫీసర్ ఎన్. శివ శంకర్ రెడ్డి పలు ఆహార తయారీ, విక్రయ కేంద్రాలను తనిఖీ చేశారు.

ఈ సందర్భంగా సంజయ్ బెంగళూరు బేకరీ, శ్రీ రాజశ్యామల హోటల్ అండ్ రెస్టారెంట్‌లలో తనిఖీలు చేపట్టారు. ఆహార తయారీ, నిల్వ ప్రాంతాల్లో పరిశుభ్రత ప్రమాణాలు పాటించకపోవడం, అపరిశుభ్ర పరిస్థితుల్లో ఆహార పదార్థాలను నిల్వ చేయడం వంటి లోపాలను గుర్తించారు. బేకరీలో ఫంగస్ సోకిన స్వీట్లు, అనుమానాస్పద రంగు కలిగిన టీ పొడి, పురుగులు సోకిన టీ పొడి, చక్కెర, కేక్‌లు, కేక్ క్రీములు, బిస్కెట్లు తదితర పదార్థాలను సక్రమంగా నిల్వ చేయకపోవడాన్ని గుర్తించారు.

అలాగే కేక్ తయారీ ప్రాంతం, హోటల్ వంటగది, రిఫ్రిజిరేటర్లు అపరిశుభ్రంగా ఉన్నట్లు అధికారులు గుర్తించారు. దీంతో స్వీట్లు, పఫ్‌లు, ఖారా, బూంది, సాస్‌లు, టీ పొడి, కేక్ క్రీములు, బిస్కెట్లు తదితర సుమారు 60 కిలోల అననుకూల ఆహార పదార్థాలను తొలగించి ధ్వంసం చేశారు. గ్రామపంచాయతీ సిబ్బంది, వాహనం సహకారంతో వాటిని డంపింగ్ యార్డుకు తరలించారు.

తనిఖీల్లో అనుమానాస్పదంగా గుర్తించిన ఆహార పదార్థాల నుంచి నమూనాలను సేకరించి విశ్లేషణ కోసం ప్రయోగశాలకు పంపించారు. నివేదికలు అందిన అనంతరం నిబంధనల ప్రకారం తదుపరి చర్యలు చేపడతామని అధికారులు తెలిపారు. గుర్తించిన లోపాలపై సంజయ్ బెంగళూరు బేకరీ, శ్రీ రాజశ్యామల హోటల్ అండ్ రెస్టారెంట్‌లకు రెండు ఇంప్రూవ్‌మెంట్ నోటీసులు జారీ చేయాలని జిల్లా డిజిగ్నేటెడ్ ఆఫీసర్ కుమారి పి. స్వాతికి సిఫార్సు చేశారు.

ఆహార తయారీ ప్రదేశాలు, వంటగదులు, రిఫ్రిజిరేటర్లు, పరికరాలు, నిల్వ ప్రాంతాలను పరిశుభ్రంగా నిర్వహించాలని, ఆహార పదార్థాలను కీటకాలు, ఫంగస్, ఇతర కలుషితాలకు గురికాకుండా సురక్షితంగా నిల్వ చేయాలని అధికారులు సూచించారు. వినియోగదారులకు సురక్షితమైన, నాణ్యమైన ఆహారాన్ని మాత్రమే అందించాలని ఆహార వ్యాపార నిర్వాహకులకు స్పష్టం చేశారు.