డ్రగ్స్ మాఫియాపై ఉక్కుపాదం నల్లగొండ టూ టౌన్ కానిస్టేబుల్ షకీల్‌కు ఉత్తమ అవార్డు...

​నల్లగొండ : జిల్లాలో మాదకద్రవ్యాల కట్టడికి ప్రత్యేక శ్రద్ధ చూపుతూ, డ్రగ్స్ మాఫియా నడుము విరిచిన నల్లగొండ టూ టౌన్ పోలీస్ స్టేషన్ కానిస్టేబుల్ మొహమ్మద్ షకీల్ ఉత్తమ ప్రతిభ పురస్కారాన్ని అందుకున్నారు. ప్రాంతంలో డ్రగ్స్ సరఫరా, విక్రయాలు, వినియోగంపై నిరంతరం నిఘా ఉంచుతూ పలు కీలక కేసుల చేధనలో ఆయన చురుగ్గా వ్యవహరించారు. ఈ నేపథ్యంలో హైదరాబాద్‌లో ఏర్పాటు చేసిన ప్రత్యేక కార్యక్రమంలో ఈగల్ (EAGLE - అంటీ నార్కోటిక్స్ బ్యూరో) ఏడీజీ సందీప్ శాండిల్య చేతుల మీదుగా కానిస్టేబుల్ షకీల్ ఈ ప్రతిష్టాత్మక అవార్డును స్వీకరించారు. యువతను మాదకద్రవ్యాల బారిన పడకుండా కాపాడటంలో, జిల్లా వ్యాప్తంగా గంజాయి తదితర మత్తు పదార్థాల రవాణాను అరికట్టడంలో నల్లగొండ పోలీసులు చూపుతున్న చొరవ అభినందనీయమని ఈ సందర్భంగా ఏడీజీ ప్రశంసించారు. కానిస్టేబుల్ షకీల్‌కు ఉత్తమ అవార్డు దక్కడంపై నల్లగొండ టూ టౌన్ సీఐ ఆదిరెడ్డి, ఎస్సై డి. సైదాబాబు ప్రత్యేకంగా అభినందనలు తెలిపారు. నిబద్ధతతో విధులు నిర్వహిస్తూ పోలీస్ శాఖకు మంచి పేరు తెచ్చారని కొనియాడారు. షకీల్‌కు అవార్డు రావడం పట్ల టూ టౌన్ పోలీస్ స్టేషన్ సిబ్బంది హర్షం వ్యక్తం చేశారు.