రామన్నపేట సెప్టెంబర్‌ 28 స్థానికం ప్రతినిధి :

దివ్యాంగుల హక్కుల పరిరక్షణకు అధికారులు సహకరించాలని విశ్వవిద్యాలయాల దివ్యాంగుల ఫోరం తెలంగాణ రాష్ట్ర కమిటీ కోరింది. ఈ మేరకు ఫోరం రాష్ట్ర అధ్యక్షుడు డాక్టర్‌ ఎం.అశోక్‌ ఆధ్వర్యంలో ప్రతినిధులు రామన్నపేట తహసీల్దార్‌ను కలిసి దివ్యాంగుల సమస్యలను వివరించారు. అనంతరం దివ్యాంగుల హక్కుల చట్టం–2016 పుస్తకాన్ని అందజేశారు.దివ్యాంగులకు విద్య, ఉపాధి, రిజర్వేషన్లు, సామాజిక భద్రత, ప్రభుత్వ సంక్షేమ పథకాలు, వివక్షకు వ్యతిరేకంగా రక్షణ తదితర హక్కులు ఉన్నాయని తెలిపారు. గ్రామీణ ప్రాంతాల్లోని దివ్యాంగులకు చట్టంపై అవగాహన కల్పించేందుకు మండల స్థాయిలో అవగాహన కార్యక్రమాలు నిర్వహించాలని కోరారు. దివ్యాంగుల సమస్యల పరిష్కారానికి అధికారులు, స్వచ్ఛంద సంస్థలు, సంఘాలు సమన్వయంతో పనిచేయాలని సూచించారు.

కార్యక్రమంలో రాష్ట్ర వర్కింగ్‌ ప్రెసిడెంట్‌ మారవేణి చంద్రశేఖర్‌ యాదవ్‌, రాష్ట్ర ఉపాధ్యక్షురాలు గొరికే రేణుక, సహాయ కార్యదర్శి గుండ్లపల్లి నాగేశ్వర్‌ తదితరులు పాల్గొన్నారు.