యాదాద్రి భువనగిరి: గణేష్ నవరాత్రి ఉత్సవాలను భక్తిశ్రద్ధలతో నిర్వహించడంతో పాటు నిమజ్జన కార్యక్రమాలను భారతీయ సంస్కృతి, సంప్రదాయాలు ఉట్టిపడేలా నిర్వహించాలని తెలంగాణ సామాజిక రచయితల సంఘం యాదాద్రి జిల్లా అధ్యక్షుడు తలారి గణేష్ సూచించారు. గణేష్ ఉత్సవాలు దేశ ప్రజలను ఏకతాటిపైకి తీసుకురావడంలో చారిత్రక ప్రాధాన్యత కలిగి ఉన్నాయని పేర్కొన్నారు.

సంప్రదాయాలకు పెద్దపీట..

నిమజ్జనం సందర్భంగా డీజేలు, సౌండ్‌ బాక్సులు, బ్రాస్‌ బ్యాండ్లు, రీమిక్స్‌ పాటలతో అధిక శబ్దాలు చేస్తూ నృత్యాలు చేయడం కంటే భక్తిగీతాలు, భజనలు, కోలాటాలు, సంప్రదాయ నృత్యాలు, భాజభజంత్రీలతో గణనాథుడిని సాగనంపాలని కోరారు. యువత భారతీయ సంస్కృతి, సంప్రదాయాలను పాటించాలని సూచించారు.

కాలుష్యాన్ని నివారిద్దాం..

నిమజ్జనం సమయంలో టపాకాయలు కాల్చకుండా వాయు కాలుష్యాన్ని నియంత్రించాలన్నారు. విగ్రహాలను తరలించే వాహనాలను అవసరం లేని సమయంలో ఆపివేయడం ద్వారా పొగ కాలుష్యాన్ని తగ్గించవచ్చన్నారు. పూజలో వినియోగించిన పూలు, పూలదండలు, కొబ్బరికాయలు, పండ్లు, కాగితాలు, పత్రి తదితరాలను నీటిలో వేయకుండా సంబంధిత గ్రామపంచాయతీ, మున్సిపాలిటీ, కార్పొరేషన్‌ సిబ్బందికి అప్పగించాలని సూచించారు.

మంచినీటి వనరుల్లో విగ్రహాల నిమజ్జనం చేయకుండా జల సంరక్షణకు ప్రతి ఒక్కరూ బాధ్యత వహించాలని కోరారు. భారతీయ సంస్కృతి ప్రతిబింబించేలా, పర్యావరణానికి హాని కలగకుండా గణేష్ నిమజ్జనం నిర్వహిద్దామని పిలుపునిచ్చారు.