యాదాద్రి భువనగిరి జిల్లా రామన్నపేట మండలంలోని సిరిపురం గ్రామంలో మహిళా సంఘాల ఆధ్వర్యంలో గ్రామ మహిళల సహకారంతో అక్రమ మద్యం బెల్ట్ షాపులను పూర్తిగా నిషేధించాలని డిమాండ్ చేస్తూ శుక్రవారం గ్రామ సభతో పాటు భారీ అవగాహన ర్యాలీ నిర్వహించారు. మహిళలు, యువత, గ్రామ పెద్దలు, ప్రజాప్రతినిధులు పెద్ద సంఖ్యలో పాల్గొని గ్రామంలో బెల్ట్ షాపులను వెంటనే మూసివేయాలని ప్రభుత్వాన్ని, సంబంధిత అధికారులను కోరారు.

ఈ సందర్భంగా సర్పంచ్ అంబటి ఉపేంద్ర రవీందర్ రెడ్డి మాట్లాడుతూ, బెల్ట్ షాపుల వల్ల అనేక కుటుంబాలు ఆర్థికంగా చితికిపోతున్నాయని, మహిళలపై వేధింపులు, కుటుంబ కలహాలు పెరుగుతున్నాయని ఆవేదన వ్యక్తం చేశారు. గ్రామ ప్రజల భవిష్యత్తును దృష్టిలో ఉంచుకుని అక్రమ మద్యం విక్రయాలను పూర్తిగా అరికట్టాలని, గ్రామంలో ఒక్క బెల్ట్ షాపుకూ అవకాశం ఇవ్వబోమని స్పష్టం చేశారు.

సిరిపురాన్ని మద్యరహిత గ్రామంగా తీర్చిదిద్దడం మనందరి బాధ్యత. ముఖ్యంగా మహిళా సంఘాలు ముందుండి గ్రామంలో మద్యపాన వ్యతిరేక ఉద్యమాన్ని బలోపేతం చేయడం అభినందనీయం. యువత మద్యానికి దూరంగా ఉండాలి. గ్రామాభివృద్ధికి ప్రజలంతా కలిసికట్టుగా ముందుకు రావాలి" అని ఆమె పిలుపునిచ్చారు.అనంతరం పంచాయతీ కార్యదర్శి యమ్ . జ్యోతి మాట్లాడుతూ, గ్రామంలో మద్యం నియంత్రణకు ప్రజల సహకారం ఎంతో అవసరమని పేర్కొన్నారు. గ్రామ సభలో మహిళా సంఘాల ప్రతినిధులు బెల్ట్ షాపుల నిర్మూలనకు ఏకగ్రీవంగా మద్దతు ప్రకటించి, గ్రామంలో అక్రమ మద్యం విక్రయాలను అడ్డుకునేందుకు పూర్తి సహకారం అందిస్తామని ప్రకటించారు.

ఈ కార్యక్రమంలో మహిళా సంఘాల సభ్యులు, గ్రామ మహిళలు, గ్రామ పెద్దలు, యువకులు, ప్రజాప్రతినిధులు, గ్రామస్థులు తదితరులు పాల్గొన్నారు.

.