శుభకార్యాలకు వెళ్లాల్సి ఉందంటూ పోలీసులతో చిరుమర్తి లింగయ్య వాగ్వాదం.

నకిరేకల్‌: ముఖ్యమంత్రి రేవంత్‌రెడ్డి నకిరేకల్‌ నియోజకవర్గ పర్యటన నేపథ్యంలో పోలీసులు మాజీ ఎమ్మెల్యే, బీఆర్‌ఎస్‌ నాయకుడు చిరుమర్తి లింగయ్యను హౌస్‌ అరెస్ట్‌ చేశారు. సీఎం సభకు ఎలాంటి అవాంఛనీయ ఘటనలు చోటుచేసుకోకుండా పోలీసులు ముందస్తు చర్యల్లో భాగంగా ఈ నిర్ణయం తీసుకున్నట్లు తెలిసింది.

తనను ఇంటి నుంచి బయటకు వెళ్లకుండా పోలీసులు ఆంక్షలు విధించడంపై చిరుమర్తి లింగయ్య అభ్యంతరం వ్యక్తం చేశారు. తాను పలు శుభకార్యాలకు హాజరు కావాల్సి ఉందని, బయటకు వెళ్లేందుకు అనుమతించాలని పోలీసులను కోరుతూ వారితో వాగ్వాదానికి దిగినట్లు సమాచారం. అయితే సీఎం పర్యటన పూర్తయ్యే వరకు బయటకు వెళ్లేందుకు అనుమతి లేదని పోలీసులు స్పష్టం చేసినట్లు తెలిసింది.

సీఎం సభ నేపథ్యంలో నకిరేకల్‌ నియోజకవర్గంలో పలువురు బీఆర్‌ఎస్‌ నేతలను పోలీసులు ముందస్తుగా అప్రమత్తం చేయడంతో పాటు, పరిస్థితులను ఎప్పటికప్పుడు పర్యవేక్షిస్తున్నారు.