ఆందోల్ మండలం పరిధిలోని నేరేడుగుంట గ్రామ పంచాయతీ కార్యాలయంలో సోమవారం స్వయం సహాయక సంఘాల మహిళలకు శిక్షణ కార్యక్రమం నిర్వహించారు. ఈ సందర్భంగా పాలమూరు మండల సమాఖ్య సీఆర్పీ లు ట్రైనర్లు స్వప్న, వసంత మాట్లాడుతూ మహిళలు క్రమం తప్పకుండా పొదుపు చేస్తూ ఆర్థికంగా స్వావలంబన సాధించాలని సూచించారు. స్వయం సహాయక సంఘాల నిర్వహణ, బ్యాంకు రుణాలను సక్రమంగా వినియోగించుకోవడం, రుణాల ద్వారా ఆదాయం పెంచే జీవనోపాధి అవకాశాలను ఎంచుకోవడం వంటి అంశాలపై మహిళలకు అవగాహన కల్పించారు. మహిళా సంఘాలు పేదరిక నిర్మూలనతో పాటు కుటుంబాల ఆర్థిక అభివృద్ధిలో కీలక పాత్ర పోషిస్తున్నాయని తెలిపారు. ప్రతి మహిళ అందుబాటులో ఉన్న రుణాలను సద్వినియోగం చేసుకుని ఉపాధి అవకాశాలను పెంచుకోవాలని సూచించారు. ఈ కార్యక్రమానికి ముఖ్య అతిథులుగా ఐబీ డీపీఎం జాన్ కెనడీ, ఐబీ ఏపీఎం శివకుమార్ పాల్గొన్నారు. మహిళలు ఆర్థికంగా బలపడితే కుటుంబాలతో పాటు గ్రామాలు కూడా అభివృద్ధి చెందుతాయని పేర్కొన్నారు. కార్యక్రమంలో అందోల్ మండల ఏపీఎం దేవేందర్, సీసీ మల్లేశం, వీఓఏలు అశోక్, సునీత, గ్రామ మహిళా సంఘాల అధ్యక్షురాలు, సభ్యులు తదితరులు పాల్గొన్నారు.