నిమజ్జనం చూసేందుకు వెళ్తుండగా ఢీకొట్టిన కారు

లింగోజిగూడెం జాతీయ రహదారిపై విషాదం

జాతీయ రహదారి 65పై బుధవారం రాత్రి జరిగిన రోడ్డు ప్రమాదంలో ఓ విదేశీ ప్రాంతానికి చెందిన వ్యక్తి అక్కడికక్కడే మృతి చెందాడు. చౌటుప్పల్ ఇన్స్పెక్టర్ ఆఫ్ పోలీస్ జి.మన్మధ కుమార్ తెలిపిన వివరాల ప్రకారం.. ఒడిశా రాష్ట్రానికి చెందిన రాంబియాష్ కేవత్ (37, తండ్రి: గోపాల్ కేవత్) గత రెండు నెలలుగా లింగోజిగూడెంలోని అంబేద్కర్ విగ్రహం సమీపంలో ఉన్న ఓ చిన్న టిఫిన్ సెంటర్‌లో పనిచేస్తున్నాడు.​ఈ క్రమంలో ఈనెల 23న (బుధవారం) రాత్రి 10 గంటల సమయంలో గణేష్ నిమజ్జన వేడుకలను చూసేందుకుగాను విజయవాడ-హైదరాబాద్ జాతీయ రహదారిని దాటుతుండగా.. విజయవాడ వైపు నుంచి వేగంగా వచ్చిన కారు (TS 09 FQ 1881) అతడిని బలంగా ఢీకొట్టింది. ఈ ప్రమాదంలో రాంబియాష్ తలకు, శరీరానికి తీవ్ర రక్తగాయాలై అక్కడికక్కడే ప్రాణాలు విడిచాడు.​టిఫిన్ సెంటర్ యజమాని ప్రభు చరణ్ ఇచ్చిన ఫిర్యాదు మేరకు కేసు నమోదు చేసుకుని దర్యాప్తు ప్రారంభించినట్లు సీఐ మన్మధ కుమార్ వెల్లడించారు.