నారాయణఖేడ్ నియోజకవర్గంలోని మానూర్ మండల పరిధి బోరంచ గ్రామంలో శ్రీ ఊరడమ్మ మరియు శ్రీ పాపమ్మ అమ్మవార్ల వార్షికోత్సవ బోనాల పండుగను మే 1వ తేదీ శుక్రవారం ఘనంగా నిర్వహించనున్నట్లు గ్రామ పెద్దలు, గ్రామస్థులు ఒక ప్రకటనలో తెలిపారు. గ్రామ ప్రజల ఆధ్యాత్మిక విశ్వాసాలకు ప్రతీకగా జరిగే ఈ ఉత్సవాలను ప్రతి ఏడాది భక్తిశ్రద్ధలతో నిర్వహించడం ఆనవాయితీగా కొనసాగుతోందన్నారు. వార్షికోత్సవ వేడుకలలో భాగంగా గురువారం రాత్రి గ్రామమంతా భజన కళాకారులతో భక్తి గీతాల మధ్య భజన కార్యక్రమం నిర్వహించబడుతుందని పేర్కొన్నారు. అనంతరం శుక్రవారం ఉదయం శ్రీ ఊరడమ్మ అమ్మవారి బోనాలు, సాయంత్రం శ్రీ పాపమ్మ అమ్మవారి బోనాలు సంప్రదాయబద్ధంగా నిర్వహించనున్నట్లు తెలిపారు. అలాగే భక్తుల కోసం ప్రత్యేకంగా అన్నదాన కార్యక్రమం కూడా ఏర్పాటు చేసినట్లు వెల్లడించారు. ఈ పండుగలో గ్రామ ప్రజలతో పాటు పరిసర ప్రాంతాల భక్తులు అధిక సంఖ్యలో పాల్గొని అమ్మవార్ల ఆశీస్సులు పొందాలని, కార్యక్రమాన్ని విజయవంతం చేయాలని గ్రామ పెద్దలు పిలుపునిచ్చారు.