అంగారక సంకష్టహర చతుర్థి సందర్భంగా రేజింతల్‌లోని సిద్ది వినాయక ఆలయానికి భక్తులు అధిక సంఖ్యలో వచ్చే అవకాశం ఉండటంతో జిల్లా ఎస్పీ పరితోష్ పంకజ్, ఐపీఎస్ ఆలయాన్ని సందర్శించి భద్రతా, బందోబస్తు ఏర్పాట్లను పరిశీలించారు. ఆలయ పరిసరాల్లో భక్తుల రాకపోకలు, క్యూలైన్ల నిర్వహణ, వాహనాల రాకపోకలు, ట్రాఫిక్ నియంత్రణ తదితర అంశాలను పరిశీలించిన ఎస్పీ, భక్తులకు ఎలాంటి ఇబ్బందులు కలగకుండా పటిష్టమైన భద్రతా ఏర్పాట్లు చేయాలని అధికారులకు సూచించారు.ఆలయ పరిసరాల్లో ట్రాఫిక్‌కు అంతరాయం కలగకుండా చర్యలు తీసుకోవాలని, భక్తుల రద్దీని దృష్టిలో ఉంచుకుని పోలీసు సిబ్బంది అప్రమత్తంగా ఉండాలని ఆదేశించారు. అత్యవసర పరిస్థితుల్లో వెంటనే స్పందించేలా ఏర్పాట్లు చేయాలని తెలిపారు. భక్తులు పోలీసులకు సహకరిస్తూ క్రమశిక్షణతో క్యూలైన్లలో స్వామివారిని దర్శించుకుని ప్రశాంతంగా తిరిగి వెళ్లేలా అన్ని చర్యలు చేపట్టాలని సూచించారు. ఈ సందర్భంగా జహీరాబాద్ డీఎస్పీ సైదా నాయక్, రూరల్ ఇన్‌స్పెక్టర్ హనుమంతు, ఎస్‌ఐలు సుజిత్, క్రాంతి పాటిల్, ఆలయ సిబ్బంది తదితరులు పాల్గొన్నారు.