మూడు విభాగాల్లో అవార్డులు.. కళాశాలకు ఘనత.

నల్గొండ, సెప్టెంబర్ 27: రాష్ట్రస్థాయి పర్యాటక పోటీల్లో నల్గొండ నాగార్జున ప్రభుత్వ కళాశాల (అటానమస్) విద్యార్థులు సత్తాచాటారు. మూడు విభాగాల్లో అవార్డులు సాధించి కళాశాలకు గుర్తింపు తీసుకొచ్చారు. ప్రపంచ పర్యాటక దినోత్సవం సందర్భంగా హైదరాబాద్‌ శిల్పారామంలో నిర్వహించిన రాష్ట్రస్థాయి కార్యక్రమంలో పర్యాటక శాఖ మంత్రి జూపల్లి కృష్ణారావు చేతుల మీదుగా విద్యార్థులు అవార్డులు అందుకున్నారు.షార్ట్‌ఫిల్మ్‌/సోషల్‌ మీడియా క్యాంపెయిన్‌ విభాగంలో పి. నిశ్చల (II B.A.), ఆర్ట్స్‌ అండ్‌ క్రాఫ్ట్స్‌ విభాగంలో జి. జ్యోత్స్న (III B.Sc. BTBC), కమ్యూనిటీ యాక్టివిటీ విభాగంలో బి. నాగార్జున, జి. మణిచరణ్, ఐ. రాఘవేంద్ర, ఉదయ్, బి. శంకర్‌ అవార్డులు సాధించారు.

విద్యార్థుల విజయంపై కళాశాల ప్రిన్సిపాల్‌ ప్రొఫెసర్‌ సముద్రాల ఉపేందర్‌ హర్షం వ్యక్తం చేశారు. రాష్ట్రస్థాయిలో మూడు విభాగాల్లో అవార్డులు సాధించడం గర్వకారణమన్నారు. విజేతలతో పాటు జిల్లా యువ టూరిజం క్లబ్‌ కోఆర్డినేటర్‌ నర్సింగ్‌ కోటయ్యను అభినందించారు.