ఎల్బీనగర్‌: రైతులకు ఆధునిక సాంకేతికతను చేరువ చేసి, తక్కువ పెట్టుబడితో అధిక దిగుబడులు సాధించేలా అవగాహన కల్పించేందుకు ‘రైతు బడి’కి శ్రీకారం చుట్టారు. ఎల్బీనగర్‌ చిత్ర లేఅవుట్‌లో శనివారం నిర్వహించిన కార్యక్రమాన్ని బీఆర్‌ఎస్‌ సీనియర్‌ నాయకుడు, మాజీ మంత్రి తన్నీరు హరీశ్‌రావు, ఎల్బీనగర్‌ ఎమ్మెల్యే దేవిరెడ్డి సుధీర్‌రెడ్డి ప్రారంభించారు. గడ్డిఅన్నారం మాజీ కార్పొరేటర్‌ భవాని ప్రవీణ్‌కుమార్‌తో పాటు పలువురు నాయకులు, కార్యకర్తలు పాల్గొన్నారు.

ఈ సందర్భంగా హరీశ్‌రావు, సుధీర్‌రెడ్డి మాట్లాడుతూ.. తెలంగాణ వ్యవసాయ రంగ అభివృద్ధికి గత బీఆర్‌ఎస్‌ ప్రభుత్వం చేపట్టిన సాగునీటి ప్రాజెక్టులు, రైతుబంధు, రైతుబీమా తదితర కార్యక్రమాలను ప్రస్తావించారు. రైతుల సంక్షేమానికి కేసీఆర్‌ ప్రభుత్వం ప్రాధాన్యం ఇచ్చిందని పేర్కొన్నారు. ప్రస్తుత కాంగ్రెస్‌ ప్రభుత్వ పాలనలో అభివృద్ధి కుంటుపడిందని వారు విమర్శించారు.

‘రైతు బడి’ నిర్వాహకుడు, మాజీ వ్యవసాయ జర్నలిస్ట్‌ జూలకంటి రాజేందర్‌రెడ్డి మాట్లాడుతూ.. ఏ కాలంలో ఏ పంటలు సాగు చేయాలి, ఆధునిక సాంకేతికతను ఎలా వినియోగించాలి, తక్కువ ఖర్చుతో అధిక దిగుబడులు ఎలా సాధించాలనే అంశాలపై రైతులకు ప్రతిరోజూ వీడియోల ద్వారా అవగాహన కల్పిస్తామని తెలిపారు. వ్యవసాయంలో వస్తున్న నూతన సాంకేతికతను రైతులకు చేరువ చేయడమే ‘రైతు బడి’ లక్ష్యమని వివరించారు.