బీజేపీ, హిందూ సంస్థల ధర్నా.. నిందితుడు పోలీసుల అదుపులో

దిల్‌సుఖ్‌నగర్‌: సంతోషిమాత ఆలయంలో పూజారిపై దాడి ఘటన దిల్‌సుఖ్‌నగర్‌లో ఉద్రిక్తతకు దారితీసింది. చైతన్యపురి పోలీస్‌స్టేషన్‌ పరిధిలో శుక్రవారం మధ్యాహ్నం ఈ ఘటన చోటుచేసుకుంది. ఆలయంలోకి ప్రవేశించిన ఓ వ్యక్తి.. అమ్మవారి విగ్రహం సమీపంలో విధులు నిర్వహిస్తున్న పూజారిపై కర్రతో దాడి చేసినట్లు సమాచారం. దీంతో ఆలయ ప్రాంగణంలో ఒక్కసారిగా కలకలం రేగింది.

బస్టాండ్‌ వద్ద బైఠాయింపు.

ఘటన విషయం తెలుసుకున్న హిందూ సంస్థల ప్రతినిధులు, బీజేపీ నాయకులు దిల్‌సుఖ్‌నగర్‌ బస్టాండ్‌ వద్దకు చేరుకున్నారు. నిందితుడిపై కఠిన చర్యలు తీసుకోవాలని డిమాండ్‌ చేస్తూ ప్రధాన రహదారిపై బైఠాయించి నిరసన చేపట్టారు. సుమారు 30–40 మంది ఆందోళనకు దిగడంతో వాహనాల రాకపోకలకు స్వల్ప అంతరాయం ఏర్పడింది.

పోలీసుల రంగప్రవేశం

పరిస్థితి ఉద్రిక్తంగా మారడంతో చైతన్యపురి, మలక్‌పేట్‌ పోలీసులు, ట్రాఫిక్‌ పోలీసులు ఘటనాస్థలికి చేరుకున్నారు. నిరసనకారులను రోడ్డుపై నుంచి పక్కకు తరలించి ట్రాఫిక్‌ను పునరుద్ధరించారు. పూజారిపై దాడికి పాల్పడిన వ్యక్తిని అదుపులోకి తీసుకుని పోలీసులు విచారిస్తున్నట్లు సమాచారం. ఎలాంటి అవాంఛనీయ ఘటనలు చోటుచేసుకోకుండా పోలీసులు బందోబస్తు ఏర్పాటు చేశారు.