రామన్నపేట మండల కేంద్రంలో ముఖ్యమైన ఒరిజినల్ సర్టిఫికెట్లు, ఇతర పత్రాలు ఉన్న బ్యాగును పోగొట్టుకున్న బాధితుడికి రామన్నపేట పోలీసులు సకాలంలో గుర్తించి అప్పగించారు. దీంతో బాధిత కుటుంబంలో ఆనందం నెలకొంది.

సిరబోయిన పోలరాజు తన కుమార్తెతో కలిసి ద్విచక్ర వాహనంపై రామన్నపేట నుంచి ఉత్తటూరు వెళ్తుండగా మార్గమధ్యంలో సర్టిఫికెట్లు, ఇతర కీలక పత్రాలు ఉన్న బ్యాగును పొరపాటున పోగొట్టుకున్నాడు. ఎంత వెతికినా బ్యాగు ఆచూకీ లభించకపోవడంతో రామన్నపేట పోలీస్ స్టేషన్‌లో ఫిర్యాదు చేశాడు.

ఫిర్యాదు అందుకున్న ఎస్‌ఐ నాగరాజు ఆధ్వర్యంలోని పోలీసు బృందం వెంటనే దర్యాప్తు ప్రారంభించింది. పరిసర ప్రాంతాల్లోని సీసీటీవీ కెమెరాల ఫుటేజీలను పరిశీలించి, క్షేత్రస్థాయిలో గాలింపు చర్యలు చేపట్టింది. కొన్ని గంటల్లోనే బ్యాగును గుర్తించి స్వాధీనం చేసుకుంది.

అనంతరం బాధితుడిని పోలీస్ స్టేషన్‌కు పిలిపించి, అతని సమక్షంలో బ్యాగును తనిఖీ చేశారు. అందులోని ఒరిజినల్ సర్టిఫికెట్లు, ఇతర పత్రాలు క్షేమంగా ఉన్నట్లు నిర్ధారించిన అనంతరం బాధితుడికి అప్పగించారు.

తమకు అత్యంత విలువైన పత్రాలను తిరిగి అందించినందుకు సిరబోయిన పోలరాజు, ఆయన కుటుంబ సభ్యులు రామన్నపేట పోలీసులకు కృతజ్ఞతలు తెలిపారు.