ఫస్ట్ ఇయర్‌లో ఫెయిల్ అయిన నిరాశతో యువతి ఆత్మహత్యకు పాల్పడిన ఘటన నారాయణఖేడ్ నియోజకవర్గంలోని నాగలిగిద్ద మండలం కారమంగి గ్రామంలో తీవ్ర విషాదాన్ని కలిగించింది. గ్రామానికి చెందిన విట్టల్ కుమార్తె అంబిక నందిని హైదరాబాదులోని ఒక ప్రైవేట్ కళాశాలలో మొదటి సంవత్సరం చదువుతోంది. ఇటీవల విడుదలైన పరీక్ష ఫలితాల్లో ఆశించిన ఫలితం రాకపోవడంతో తీవ్ర నిరాశకు గురై, హైదరాబాదులోనే ఆత్మహత్యకు పాల్పడినట్లు గ్రామస్తులు తెలిపారు. ఈ దుర్ఘటన విషయం గ్రామానికి తెలియడంతో కారమంగి గ్రామం మొత్తం శోకసంద్రంగా మారింది; కుటుంబ సభ్యులు, బంధువులు, స్నేహితులు కన్నీటి పర్యంతమై విలపిస్తున్నారు. చిన్న వయసులోనే ఇలాంటి ఘటన జరగడం పట్ల గ్రామస్తులు తీవ్ర ఆవేదన వ్యక్తం చేస్తూ, విద్యార్థులు పరాజయాలను ధైర్యంగా ఎదుర్కొని ముందుకు సాగాలని సూచిస్తున్నారు. సోమవారం సాయంత్రం కారమంగి గ్రామంలో అంబిక నందిని అంత్యక్రియలు నిర్వహించనున్నట్లు కుటుంబ సభ్యులు తెలిపారు; ఈ ఘటనతో గ్రామంలో తీవ్ర విషాద వాతావరణం నెలకొంది.