జిల్లాలో వానాకాలం 2026–27 సీజన్‌ పత్తి కొనుగోళ్లను రైతులకు ఎలాంటి ఇబ్బందులు లేకుండా పారదర్శకంగా నిర్వహించేందుకు అన్ని శాఖలు సమన్వయంతో పనిచేయాలని అదనపు కలెక్టర్ (రెవెన్యూ) సంగీత ఆదేశించారు. సోమవారం కలెక్టరేట్‌లో మార్కెటింగ్ శాఖ ఆధ్వర్యంలో అధికారులు, జిన్నింగ్ మిల్లుల యాజమాన్యాలతో నిర్వహించిన సమీక్ష సమావేశంలో ఆమె మాట్లాడారు. జిల్లాలో ఈ సీజన్‌లో 3,57,246 ఎకరాల్లో పత్తి సాగు కాగా, సుమారు 3,16,520 మెట్రిక్ టన్నుల దిగుబడి వస్తుందని వ్యవసాయ శాఖ అంచనా వేసిందన్నారు. పత్తి కనీస మద్దతు ధర క్వింటాల్‌కు రూ.8,667గా నిర్ణయించబడిందని, రైతుల నుంచి ఎంఎస్‌పీతో పత్తి కొనుగోలులో సీసీఐ కీలకంగా వ్యవహరిస్తుందని తెలిపారు.అక్టోబర్ 1 నుంచి కొనుగోళ్లు ప్రారంభించేలా అన్ని ఏర్పాట్లు పూర్తి చేయాలని, అధీకృత జిన్నింగ్ మిల్లులను అందుబాటులోకి తీసుకురావాలని సూచించారు. కొనుగోలు కేంద్రాల్లో వేబ్రిడ్జ్‌లు, సీసీ కెమెరాలు, వేలిముద్ర స్కానర్లు, ఇంటర్నెట్, అగ్నిమాపక పరికరాలు ఏర్పాటు చేసి తూకాల్లో ఎలాంటి తేడాలు లేకుండా చూడాలని ఆదేశించారు. రైతులు కాపాస్ కిసాన్ యాప్‌లో నమోదు చేసుకుని స్లాట్ బుకింగ్ చేసుకునేలా, పత్తి నాణ్యత, తేమ శాతం తదితర అంశాలపై అవగాహన కల్పించాలని సూచించారు. జిల్లాలో సదాశివపేట, రైకోడ్, నారాయణఖేడ్, జోగిపేట, వట్‌పల్లి, జహీరాబాద్‌లలో ఆరు కాటన్ ఏఎంసీలు ఉండగా, ఈ సీజన్‌లో 23 జిన్నింగ్ మిల్లులను ప్రతిపాదించినట్లు జిల్లా మార్కెటింగ్ శాఖ అధికారి శ్రీకాంత్ తెలిపారు. రైతుల సాగు, ఉత్పత్తి వివరాలను సెప్టెంబర్ 30లోగా కాపాస్ కిసాన్ యాప్‌లో నమోదు చేయాలని, ప్రతి మంగళవారం నిర్వహించే రైతు నేస్తం కార్యక్రమం ద్వారా స్లాట్ బుకింగ్, కొనుగోలు కేంద్రాల వివరాలను రైతులకు తెలియజేయాలని సూచించారు. పత్తి కొనుగోళ్లు సజావుగా జరిగేలా సంబంధిత శాఖల అధికారులు పరస్పర సమన్వయంతో పనిచేయాలని అదనపు కలెక్టర్ సంగీత ఆదేశించారు. సమావేశంలో జిల్లా వ్యవసాయ శాఖ అధికారి శివప్రసాద్, సంబంధిత శాఖల అధికారులు, జిన్నింగ్ మిల్లుల యాజమాన్యాలు, సిబ్బంది పాల్గొన్నారు.