​​యునాని వైద్య విధానం ఎంతో సురక్షితం: చైర్‌పర్సన్ పావని రమేష్ గౌడ్

11వ ఆయుర్వేద దినోత్సవాన్ని పురస్కరించుకుని చౌటుప్పల్ పురపాలక కార్యాలయంలో మున్సిపల్ చైర్‌పర్సన్ మొగుదాల పావని రమేష్ గౌడ్ అధ్యక్షతన పారిశుద్ధ్య కార్మికులకు ఉచిత యునాని వైద్య పరీక్షల శిబిరం నిర్వహించారు.ఈ సందర్భంగా కార్మికులకు ఉచితంగా వైద్య పరీక్షలు చేసి, మందులు పంపిణీ చేశారు.​ఈ సందర్భంగా చైర్‌పర్సన్ పావని రమేష్ గౌడ్ మాట్లాడుతూ... ఎటువంటి పార్శ్వ ప్రభావాలు (సైడ్ ఎఫెక్ట్స్) లేని పురాతన వైద్య విధానాలలో యునాని అగ్రగామిగా నిలిచిందన్నారు. ఈ వైద్య విధానాన్ని ప్రజల్లోకి మరింతగా తీసుకెళ్లడంతో పాటు నిరంతరం కష్టపడే పారిశుద్ధ్య కార్మికులకు అందుబాటులో ఉంచేందుకు ఈ ఉచిత వైద్య శిబిరాన్ని ఏర్పాటు చేసినట్లు తెలిపారు. కార్మికులందరూ ఈ అవకాశాన్ని సద్వినియోగం చేసుకొని తమ ఆరోగ్యాన్ని కాపాడుకోవాలని కోరారు.​మున్సిపల్ కమిషనర్ ఎన్. వెంకటేశ్వర నాయక్ మాట్లాడుతూ... పారిశుద్ధ్య కార్మికుల సంక్షేమాన్ని దృష్టిలో ఉంచుకుని ఈ వైద్య శిబిరాన్ని ఏర్పాటు చేశామని, ప్రతీ ఒక్కరూ ఈ చికిత్సా సేవలను ఉపయోగించుకోవాలని సూచించారు.​ఈ కార్యక్రమంలో యునాని మెడికల్ ఆఫీసర్ డాక్టర్ రోజ్ మేరీ, వార్డు కౌన్సిలర్లు బద్రి గాలయ్య, పాక చిరంజీవి, ఊదరి యాదయ్య, నాయకులు చింతల సాయిలు, పర్యావరణ ఇంజనీర్ రేణు కుమార్, నేచురోపతి ఫార్మసిస్ట్ అశ్విని, యోగా ఇన్‌స్పెక్టర్లు ఝాన్సీ, సాత్విక్, హోమియోపతి ఫార్మసిస్ట్ సరిత, మున్సిపల్ పారిశుద్ధ్య సిబ్బంది, జవాన్లు, కూరగాయల వ్యాపారులు, స్థానిక ప్రజలు భారీ సంఖ్యలో పాల్గొన్నారు.