మంచాల, సెప్టెంబర్ 23:

వరల్డ్ క్లీనప్ డే సందర్భంగా తిరుమల మిల్క్ ప్రొడక్ట్స్ ప్రైవేట్ లిమిటెడ్ (లాక్టాలిస్ ఇండియా గ్రూప్) గునగల్ ప్లాంట్ ఆధ్వర్యంలో బుధవారం ఎల్లమ్మతండ గ్రామంలోని ఆంజనేయస్వామి ఆలయ ప్రాంగణంలో ప్రత్యేక పారిశుద్ధ్య కార్యక్రమం నిర్వహించారు.

ప్లాంట్ మేనేజర్ ధర్మరాజు ఆధ్వర్యంలో సంస్థ సిబ్బంది ఆలయ పరిసరాల్లో పేరుకుపోయిన ప్లాస్టిక్, వ్యర్థాలు, పారిశుద్ధ్య వ్యర్థాలను సేకరించి డంపింగ్ యార్డుకు తరలించారు. పరిసరాలను పరిశుభ్రంగా ఉంచుకోవడంతో పాటు ప్లాస్టిక్ వినియోగాన్ని తగ్గించాలని ఈ సందర్భంగా సూచించారు.

కార్యక్రమానికి సహకరించిన ఆలయ ధర్మకర్త చందు నాయక్ను ప్లాంట్ మేనేజర్ ధర్మరాజు శాలువాతో సత్కరించారు. పరిసరాల పరిశుభ్రతకు ప్రతి ఒక్కరూ తమ వంతు బాధ్యతగా సహకరించాలని నిర్వాహకులు కోరారు.