భువనగిరి, సెప్టెంబర్‌ 28: ప్రభుత్వ ఆస్పత్రికి చికిత్స కోసం వచ్చే రోగులు, వారి సహాయకులకు ఉచితంగా అల్పాహారం అందించేందుకు లయన్స్‌ క్లబ్‌ ఆఫ్‌ భువనగిరి ఫోర్ట్‌ ముందుకొచ్చింది. శ్రీ స్వర్ణగిరి వెంకటేశ్వరస్వామి ఆలయ సహకారంతో ప్రతిరోజూ అల్పాహార వితరణ కార్యక్రమాన్ని నిర్వహించనున్నారు.

సోమవారం ప్రభుత్వ ఏరియా ఆస్పత్రి ఆవరణలో ఆలయ ప్రధాన అర్చకులు మాన్య శ్రావణాచార్యులు, వారి శిష్యబృందం ప్రత్యేక పూజలు నిర్వహించారు. అనంతరం లయన్స్‌ క్లబ్‌ జిల్లా గవర్నర్‌, భువనగిరి ఫోర్ట్‌ క్లబ్‌ అధ్యక్షుడు రంగ కృష్ణయ్య, ప్రధాన కార్యదర్శి కొడితల నవీన్‌ తదితరులు అల్పాహార వితరణను ప్రారంభించారు.

ఈ సందర్భంగా రంగ కృష్ణయ్య మాట్లాడుతూ.. ప్రతిరోజూ ఉదయం 8 నుంచి 9 గంటల వరకు ఆస్పత్రి ఆవరణలో అల్పాహారం పంపిణీ చేస్తామని తెలిపారు. కార్యక్రమానికి సహకరిస్తున్న స్వర్ణగిరి వెంకటేశ్వరస్వామి ఆలయ నిర్వాహకులు, కుటుంబ సభ్యులకు కృతజ్ఞతలు తెలిపారు.

కార్యక్రమంలో లయన్‌ కేవీ ప్రసాద్‌, ఐపీడీజీ లయన్‌ మదన్‌మోహన్‌, డిస్ట్రిక్ట్‌ జీఎస్‌టీ కోఆర్డినేటర్‌ లయన్‌ రవీందర్‌రావు బాచుపల్లి, లయన్‌ నువ్వుల సిద్ధప్ప, లయన్స్‌ క్లబ్‌ భువనగిరి ఫోర్ట్‌ సభ్యులు తదితరులు పాల్గొన్నారు.