భువనగిరి సెప్టెంబర్ 29

ఖరీఫ్‌ సీజన్‌లో ధాన్యం కొనుగోళ్లను పకడ్బందీగా చేపట్టేందుకు ముందస్తు ప్రణాళికతో ఏర్పాట్లు పూర్తి చేయాలని జిల్లా అదనపు కలెక్టర్‌ వెంకారెడ్డి అధికారులను ఆదేశించారు. మంగళవారం కలెక్టరేట్‌లో ధాన్యం కొనుగోళ్లపై నిర్వహించిన సన్నాహక సమావేశంలో ఆయన మాట్లాడారు.

జిల్లాలో సుమారు 3 లక్షల మెట్రిక్‌ టన్నుల ధాన్యం కొనుగోలు చేయాల్సి ఉంటుందని, ఇందుకోసం సుమారు 325 కొనుగోలు కేంద్రాలు ఏర్పాటు చేస్తున్నట్లు తెలిపారు. రైతులకు ఎలాంటి ఇబ్బందులు కలగకుండా అన్ని శాఖల అధికారులు సమన్వయంతో పనిచేయాలని సూచించారు. కొనుగోలు కేంద్రాల్లో గన్నీ సంచులు, తూకం యంత్రాలు, ప్యాడీ క్లీనర్లు, డ్రైయర్లు, లారీలు, హమాలీలను ముందుగానే సిద్ధం చేసుకోవాలని ఆదేశించారు.

కొనుగోలు చేసిన ధాన్యాన్ని ఎప్పటికప్పుడు రైస్‌ మిల్లులకు తరలించాలని, రైతులకు చెల్లించాల్సిన నగదు సకాలంలో వారి ఖాతాల్లో జమ అయ్యేలా చర్యలు తీసుకోవాలని సూచించారు. కొనుగోలు కేంద్రాల్లో తాగునీరు తదితర కనీస వసతులు కల్పించాలని, పరిసరాలను పరిశుభ్రంగా ఉంచాలని ఆదేశించారు.సన్న వడ్లకు క్వింటాల్‌కు రూ.500 బోనస్‌ అందించనున్నట్లు తెలిపారు. ఏ–గ్రేడ్‌ ధాన్యానికి క్వింటాల్‌కు రూ.2,461, సాధారణ రకానికి రూ.2,441 మద్దతు ధర చెల్లించనున్నట్లు వెంకారెడ్డి పేర్కొన్నారు