నారాయణఖేడ్ నారాయణఖేడ్ మున్సిపల్ పట్టణంలోని బాలాజీ అనురాధ ఆసుపత్రిలో మహాత్మా గాంధీ, లాల్ బహదూర్ శాస్త్రి, దివంగత మాజీ ఎమ్మెల్యే పట్లోళ్ల కిష్టారెడ్డి జయంతి సందర్భంగా బాలాజీ అనురాధ ఆసుపత్రి, లయన్స్ క్లబ్ ఆధ్వర్యంలో ఉచిత మెగా వైద్య శిబిరం, మహా రక్తదాన శిబిరాన్ని నిర్వహించారు.ఈ కార్యక్రమంలో నారాయణఖేడ్ ఎమ్మెల్యే డాక్టర్ పట్లోళ్ల సంజీవరెడ్డి, సంగారెడ్డి జిల్లా కాంగ్రెస్ పార్టీ అధ్యక్షుడు పట్లోళ్ల చంద్రశేఖర్ రెడ్డి పాల్గొన్నారు.ఈ సందర్భంగా ఎమ్మెల్యే మాట్లాడుతూ మహాత్మా గాంధీ, లాల్ బహదూర్ శాస్త్రి దేశానికి అందించిన సేవలు, చూపిన ఆదర్శాలు నేటి తరానికి స్ఫూర్తిదాయకమని అన్నారు.తన తండ్రి, దివంగత మాజీ ఎమ్మెల్యే పట్లోళ్ల కిష్టారెడ్డి జయంతిని పురస్కరించుకుని ప్రజలకు ఉపయోగపడేలా ఉచిత వైద్య, రక్తదాన శిబిరాలు నిర్వహించడం అభినందనీయమని తెలిపారు. ఆరోగ్యమే మహాభాగ్యమని, ప్రతి ఒక్కరూ ఆరోగ్యంపై శ్రద్ధ వహించాలని సూచించారు. పేద, మధ్యతరగతి ప్రజలకు ఉచిత వైద్య పరీక్షలు, వైద్య సలహాలు అందించడం ఎంతో ఉపయోగకరమని పేర్కొన్నారు. అత్యవసర సమయాల్లో రక్తం అందుబాటులో ఉండేందుకు రక్తదానం ఎంతో అవసరమని, ఆరోగ్యవంతులైన ప్రతి ఒక్కరూ స్వచ్ఛందంగా రక్తదానం చేయాలని పిలుపునిచ్చారు. సేవా కార్యక్రమాలు నిర్వహిస్తున్న బాలాజీ అనురాధ ఆసుపత్రి యాజమాన్యం, లయన్స్ క్లబ్ సభ్యులను అభినందించారు.కార్యక్రమంలో పట్లోళ్ల సుధాకర్ రెడ్డి, వైద్యులు డాక్టర్ శ్రీధర్, డాక్టర్ పట్లోళ్ల అనురాగ్ రెడ్డి, లయన్స్ క్లబ్ ప్రతినిధులు, కాంగ్రెస్ నాయకులు, కార్యకర్తలు, రక్తదాతలు, ప్రజలు తదితరులు పాల్గొన్నారు.