బాత్రూమ్‌ వెనుక యువతి మృతదేహం.. ఒంటిపై గాయాలు

పక్కింటి వ్యక్తిపై మృతురాలి తల్లి ఆరోపణ.. పోలీసుల దర్యాప్తు

భద్రాద్రి కొత్తగూడెం జిల్లా జూలూరుపాడు మండలం వెంగన్నపాలెం గ్రామంలో నర్సింగ్‌ విద్యార్థిని అనుమానాస్పదంగా మృతి చెందింది. గ్రామానికి చెందిన హరిణి (18) ఖమ్మంలోని ఓ ప్రైవేట్‌ కళాశాలలో నర్సింగ్‌ మొదటి సంవత్సరం చదువుతోంది. సెలవుల నేపథ్యంలో ఇటీవల ఇంటికి వచ్చింది. తండ్రి మృతి చెందడంతో తల్లి రాజేశ్వరి కూలి పనులు చేస్తూ ఇద్దరు కుమార్తెలను చదివిస్తోంది. ఈ క్రమంలో హరిణి ఇటీవల గ్రామంలోని బంధువుల ఇంటికి వెళ్లి తిరిగి ఇంటికి వచ్చింది. అనంతరం ఆమె కనిపించకపోవడంతో తల్లి, కుటుంబ సభ్యులు పరిసరాల్లో గాలించారు. చివరకు ఇంటి ఆవరణలోని బాత్రూమ్‌ వెనుక ఒంటిపై గాయాలతో హరిణి మృతదేహాన్ని గుర్తించినట్లు స్థానికులు తెలిపారు. కాగా, తన కుమార్తె మృతికి పక్కింటికి చెందిన వ్యక్తి కారణమై ఉండొచ్చని తల్లి రాజేశ్వరి పోలీసులకు ఆరోపించినట్లు సమాచారం. ఘటనపై పోలీసులు కేసు నమోదు చేసి దర్యాప్తు చేపట్టారు. మృతదేహాన్ని పోస్టుమార్టం నిమిత్తం ఆస్పత్రికి తరలించినట్లు తెలిసింది. పోస్టుమార్టం నివేదిక, పోలీసుల దర్యాప్తులో వెల్లడయ్యే వివరాల ఆధారంగా హరిణి మృతి కారణాలు స్పష్టమయ్యే అవకాశం ఉంది.