కుట్రలో కుటుంబ సభ్యులు, బంధువులు, ప్రభుత్వ అధికారుల పాత్ర.

రూ.5 లక్షల నగదు, కంప్యూటర్, ప్రింటర్, 12 సెల్‌ఫోన్లు స్వాధీనం.

నల్లగొండ, నవంబర్ 8: స్థానికం ప్రతినిధి

నకిలీ మరణ ధ్రువీకరణ పత్రంతో కారుణ్య నియామకం కింద ప్రభుత్వ ఉద్యోగం పొందిన వ్యవహారం నల్లగొండ జిల్లాలో కలకలం రేపింది. పదవీ విరమణ పొందిన ఉద్యోగి విధుల్లో ఉండగానే మరణించినట్లు తప్పుడు రికార్డులు సృష్టించి, ఆయన కుమారుడికి ప్రభుత్వ ఉద్యోగం ఇప్పించిన మోసాన్ని పోలీసులు ఛేదించారు. ఈ వ్యవహారంలో కుటుంబ సభ్యులు, బంధువులతో పాటు మున్సిపల్, వైద్య ఆరోగ్య శాఖలకు చెందిన అధికారులు, సిబ్బంది ప్రమేయం ఉన్నట్లు గుర్తించారు. మొత్తం 16 మందిని నిందితులుగా గుర్తించగా, 14 మందిని అరెస్టు చేసి కోర్టులో హాజరుపరిచారు. మరో ఇద్దరు పరారీలో ఉన్నారు. ఈ వివరాలను జిల్లా ఎస్పీ శరత్ చంద్ర పవార్, ఐపీఎస్ నవంబర్ 8న వెల్లడించారు.

నల్లగొండ జిల్లా శాలిగౌరారం ప్రాథమిక ఆరోగ్య కేంద్రంలో హెల్త్ అసిస్టెంట్‌గా పనిచేసిన చామకూరి వెంకటేశ్వర్లు 2025 మే 31న పదవీ విరమణ పొందారు. అనారోగ్యంతో బాధపడుతూ అదే ఏడాది నవంబర్ 17న మరణించారు. అయితే ఆయన 2025 మే 28న విధుల్లో ఉండగానే మరణించినట్లు తప్పుడు రికార్డులు సృష్టించినట్లు పోలీసుల విచారణలో వెల్లడైంది.

మృతుడి కుమారుడికి కారుణ్య నియామకం కింద ఉద్యోగం ఇప్పించాలనే ఉద్దేశంతో కుటుంబ సభ్యులు, బంధువులు, కొందరు ప్రభుత్వ ఉద్యోగులు కలిసి కుట్ర పన్నినట్లు పోలీసులు గుర్తించారు. ఈ వ్యవహారంలో మృతుడి భార్య వసంతతో రూ.13 లక్షలకు ఒప్పందం కుదుర్చుకున్నట్లు విచారణలో తేలింది.

మృతుడి ఆధార్ కార్డులో చిరునామాను మార్చి, నల్లగొండ పట్టణంలోని చైతన్యపురి కాలనీ చిరునామాతో తప్పుడు వివరాలు నమోదు చేశారు. అనంతరం వాటి ఆధారంగా నల్లగొండ మున్సిపాలిటీ నుంచి నకిలీ మరణ ధ్రువీకరణ పత్రాన్ని పొందారు. ఈ ప్రక్రియలో మీ సేవా కేంద్ర నిర్వాహకుడు, మున్సిపల్ శాఖ సిబ్బంది సహకరించినట్లు దర్యాప్తులో గుర్తించారు.

అనంతరం నకిలీ మరణ ధ్రువీకరణ పత్రాన్ని ఆధారంగా చేసుకుని వైద్య ఆరోగ్య శాఖలోని కొందరు అధికారులు, సిబ్బంది తప్పుడు విచారణ నివేదికలు రూపొందించి సమర్పించినట్లు పోలీసులు తెలిపారు. ఈ పత్రాల ఆధారంగా మృతుడి కుమారుడు చామకూరి రాజుకు దామరచర్ల ప్రాథమిక ఆరోగ్య కేంద్రంలో కారుణ్య నియామకం కింద ప్రభుత్వ ఉద్యోగం కల్పించారు.

మున్సిపల్ కమిషనర్ వంశీకృష్ణ ఫిర్యాదు మేరకు నవంబర్ 4న నల్లగొండ వన్‌టౌన్ పోలీస్ స్టేషన్‌లో కేసు నమోదైంది. జిల్లా ఎస్పీ శరత్ చంద్ర పవార్ ఆదేశాలతో డీఎస్పీ కె. శివరామిరెడ్డి పర్యవేక్షణలో ప్రత్యేక బృందాలు దర్యాప్తు చేపట్టాయి. ఈ కేసులో 14 మందిని అరెస్టు చేసి కోర్టులో హాజరుపరిచారు. మరో ఇద్దరి కోసం పోలీసులు గాలిస్తున్నారు.

నిందితుల నుంచి రూ.5 లక్షల నగదు, ఒక కంప్యూటర్, ఒక ప్రింటర్, 12 సెల్‌ఫోన్లు, మృతుడి ఫొటోను స్వాధీనం చేసుకున్నారు. వన్‌టౌన్ ఇన్‌చార్జ్ సీఐ కె. ఆది రెడ్డి, రూరల్ ఎస్‌ఐ బి. శివప్రసాద్, టూటౌన్ ఎస్‌ఐ డి. సైదాబాబు, వన్‌టౌన్ ఎస్‌ఐలు ఎన్. వెంకట్ నారాయణ, జె. సైదులుతో పాటు ఇతర పోలీసు సిబ్బంది ఈ కేసు దర్యాప్తులో పాల్గొన్నారు.