ఘణపూర్ గ్రామంలో డాక్టర్ బాబు జగ్జీవన్ రామ్ జయంతి వేడుకలు ఘనంగా నిర్వహించబడ్డాయి. నారాయణఖేడ్ నియోజకవర్గం కంగ్టి మండల పరిధిలోని ఘణపూర్ గ్రామంలోని ఎమ్మార్పీఎస్ చౌరస్తా వద్ద జరిగిన ఈ కార్యక్రమంలో గ్రామ సర్పంచ్ కృష్ణ పాల్గొని డాక్టర్ బాబు జగ్జీవన్ రామ్ చిత్రపటానికి పూలమాల వేసి ఘన నివాళులు అర్పించారు. ఈ సందర్భంగా ఆయన మాట్లాడుతూ, డాక్టర్ బాబు జగ్జీవన్ రామ్ దేశానికి అపార సేవలు చేసిన మహానీయుడు అని పేర్కొన్నారు. మూడు దశాబ్దాలకు పైగా కేంద్ర కేబినెట్ మంత్రిగా సేవలందించి అరుదైన రికార్డు సృష్టించారని, కార్మిక, రవాణా, రైల్వే, వ్యవసాయ, నీటిపారుదల, రక్షణ శాఖలతో పాటు ఉప ప్రధానమంత్రిగా పనిచేసి ప్రతి హోదాలో ప్రజలకు నిస్వార్థ సేవలందించిన గొప్ప నాయకుడు అని కొనియాడారు. సమానత్వం, సామాజిక న్యాయం కోసం ఆయన చేసిన కృషి నేటి తరానికి ఆదర్శంగా నిలుస్తుందని తెలిపారు. ఈ కార్యక్రమంలో గ్రామ పెద్దలు ఆకుల రాములు, అవుటి హనుమండ్లు, నర్సింలు, జైపాల్ మాదిగ, మనోహర్ మాదిగ, జయరాజ్, యేసప్ప, జగన్, ఎమ్మార్పీఎస్ తడ్కల్ క్లస్టర్ అధ్యక్షుడు లాల్ కుమార్ తదితరులు పాల్గొన్నారు.