నాలుగు లేబర్ కోడ్‌ల అమలును వ్యతిరేకిస్తూ రాజాపేట మండల కేంద్రంలో కార్మికులు బ్లాక్ డే నిర్వహించారు. ఐఎఫ్‌టీయూ ఆధ్వర్యంలో నల్ల జెండాలతో నిరసన ప్రదర్శన చేపట్టారు.

ఈ సందర్భంగా ఐఎఫ్‌టీయూ తెలంగాణ రాష్ట్ర ఉపాధ్యక్షుడు ఆర్. జనార్ధన్ మాట్లాడుతూ కేంద్ర ప్రభుత్వం తీసుకువచ్చిన లేబర్ కోడ్‌లు కార్మికులను యాజమాన్యాల ముందు బానిసలుగా మార్చే ప్రమాదం ఉందని ఆరోపించారు. కార్మిక వర్గం వ్యతిరేకిస్తున్నప్పటికీ ప్రభుత్వం పెడచెవిన పెట్టిందని విమర్శించారు.

జిల్లా ఉపాధ్యక్షుడు రేగు శ్రీశైలం మాట్లాడుతూ లేబర్ చట్టాలు, కార్మికుల హక్కులు, స్వేచ్ఛలను హరించే విధంగా ఈ కోడ్‌లు ఉన్నాయని అన్నారు. కార్పొరేట్ సంస్థలకు అనుకూలంగా ప్రభుత్వం వ్యవహరిస్తోందని ఆరోపించారు.

కార్మికులు కనీస వేతనాలు, సౌకర్యాలు కోరుతున్నా ప్రభుత్వం పట్టించుకోవడం లేదని, 8 గంటల పనిదినాన్ని కూడా సక్రమంగా అమలు చేయకుండా కార్మికులను దోపిడీకి గురిచేస్తోందని నాయకులు విమర్శించారు.

ఈ కార్యక్రమంలో దయ్యాల సిద్ధులు, బుగ్గ నరసింహులు, జూకంటి చంద్రయ్య, ఎర్ర గోకుల రంజిత్, ఎమ్మ బాలరాజు, బుగ్గ కొమురయ్య, బచ్చలి నరసింహులు, ఎమ్మ బీరప్ప, కోయ బాబు, పుప్పాల మల్లయ్య, బైకని బిక్షపతి, బండి సిద్ధులు, మేక ఉపేందర్, గవ్వల బాలయ్య, కాలే నరసింహులు, బండి స్వామి, దయ్యాల రవి, కోయ కృష్ణ, పెద్దోళ్ల కర్ణాకర్ తదితరులు పాల్గొన్నారు.