కోదాడ పట్టణ పరిధిలోని 26వ వార్డు బీఆర్‌ఎస్ నాయకుడు కుక్కడపు వెంకటేశ్వర్లు గారు ఇటీవల మరణించగా, బీఆర్‌ఎస్ కోదాడ టౌన్ పార్టీ ఆధ్వర్యంలో వారి నివాసం వద్ద ఆయనకు సంతాప సభను ఏర్పాటు చేశారు. ఈ కార్యక్రమానికి కోదాడ మాజీ శాసనసభ్యులు శ్రీ బొల్లం మల్లయ్య యాదవ్ గారు హాజరై, వెంకటేశ్వర్లు గారి చిత్రపటానికి పూలమాలలు వేసి ఘనంగా నివాళులర్పించారు. ఈ సందర్భంగా బొల్లం మల్లయ్య యాదవ్ గారు మాట్లాడుతూ కుక్కడపు వెంకటేశ్వర్లు గారి వ్యక్తిత్వాన్ని, పార్టీకి ఆయన చేసిన సేవలను స్మరించుకున్నారు. కుక్కడపు వెంకటేశ్వర్లు కల్మషం లేని మనిషి అని, ఎవరిపైనా ద్వేషం కానీ, అసూయ కానీ లేని వ్యక్తి అని ఆయన కొనియాడారు. ఆయన ఎల్లప్పుడూ సమాజ హితాన్ని కోరుకునే వారని, మంచి పని కోసం ఎన్నడూ వెనకడుగు వేయకుండా పోరాడే వారని గుర్తు చేసుకున్నారు. గత మున్సిపల్ ఎన్నికల సమయంలో పోటీ చేయడానికి అభ్యర్థులు లేని క్లిష్ట పరిస్థితిలో, వెంకటేశ్వర్లు గారికి ఉన్న మంచి పేరును బట్టి పార్టీ తరపున ఆయనను కోరడం జరిగిందని తెలిపారు. గెలుపోటములు దైవాధీనమని, పార్టీ విజయం కోసం తాను తప్పకుండా కృషి చేస్తానని ఆయన ఆనాడు ముందుకు వచ్చారని ప్రశంసించారు.