తెలంగాణ ఉద్యమ నేత, స్వాతంత్ర్య సమరయోధుడు కొండా లక్ష్మణ్ బాపూజీ సామాజిక న్యాయం, సమానత్వం, బడుగు బలహీన వర్గాల అభ్యున్నతికి చేసిన సేవలు చిరస్మరణీయమని జిల్లా కలెక్టర్ ప్రతీక్ జైన్ అన్నారు. సంగారెడ్డిలోని ఫ్రూట్ రీసెర్చ్ స్టేషన్ వద్ద ఉన్న కొండా లక్ష్మణ్ బాపూజీ విగ్రహం వద్ద వెనుకబడిన తరగతుల సంక్షేమ శాఖ ఆధ్వర్యంలో ఆదివారం జయంతి వేడుకలు నిర్వహించారు. ఈ సందర్భంగా కలెక్టర్ విగ్రహానికి పూలమాల వేసి నివాళులర్పించారు.కొండా లక్ష్మణ్ బాపూజీ తెలంగాణ ప్రజల హక్కులు, సామాజిక న్యాయం, సమానత్వం కోసం జీవితాంతం కృషి చేశారని, ఆయన ఆశయాలు నేటి తరాలకు స్ఫూర్తిదాయకమని తెలిపారు. సమాజంలోని అన్ని వర్గాల సమగ్ర అభివృద్ధికి ప్రతి ఒక్కరూ సమన్వయంతో పనిచేయాలని, బాపూజీ ఆశయాల సాధనకు కృషి చేయాలని పిలుపునిచ్చారు.కార్యక్రమంలో సంగారెడ్డి ఎమ్మెల్యే చింతా ప్రభాకర్, మున్సిపల్ చైర్మన్ కూన వనిత, జిల్లా గ్రంథాలయ సంస్థ చైర్మన్ అంజయ్య, వివిధ బీసీ, పద్మశాలి, వడ్డెర, విశ్వబ్రాహ్మణ, వీరశైవ లింగాయత్, కుమ్మరి, కల్లుగీత కార్మిక సంఘాల ప్రతినిధులు, టీఎన్జీవోస్ జిల్లా అధ్యక్షుడు అమర్‌నాథ్, అధికారులు, వసతి గృహ సంక్షేమాధికారులు, కార్యాలయ సిబ్బంది తదితరులు పాల్గొన్నారు.