విద్యార్థులకు బెల్టులు ప్రదానం చేసిన డా. రామ్మూర్తి యాదవ్

విద్యార్థుల ఆత్మరక్షణకు మాత్రమే కాకుండా వారి మానసిక అభివృద్ధికి కూడా కరాటే శిక్షణ ఎంతో ఉపయోగపడుతుందని ప్రముఖ వైద్యులు, 18వ వార్డు కౌన్సిలర్ డాక్టర్ ఊర రామ్మూర్తి యాదవ్ తెలిపారు. ఆదివారం స్థానిక బేబీమూన్ పాఠశాలలో సుమన్ షోటోఖాన్ కరాటే స్పోర్ట్స్ అకాడమీ ఆధ్వర్యంలో, కరాటే మాస్టర్ జె.వి. రమణ (చిన్న) నేతృత్వంలో శిక్షణ పూర్తి చేసుకున్న విద్యార్థులకు బెల్టులు, సర్టిఫికెట్లు ప్రదానం చేశారు. ఈ సందర్భంగా డా. రామ్మూర్తి యాదవ్ మాట్లాడుతూ, ప్రస్తుత సమాజంలో విద్యార్థులకు, ముఖ్యంగా విద్యార్థినులకు కరాటే శిక్షణ ఎంతో అవసరమన్నారు. కరాటే ద్వారా ఆత్మరక్షణ నైపుణ్యాలతో పాటు మెదడు చురుకుదనం పెరుగుతుందని వివరించారు. గత 30 సంవత్సరాలుగా విద్యార్థులకు కరాటే శిక్షణ అందిస్తూ, వారిని రాష్ట్ర, జాతీయ స్థాయి పోటీల్లో పాల్గొనేలా ప్రోత్సహిస్తున్న కరాటే మాస్టర్ రమణను అభినందించారు. విద్యార్థులు చదువుతో పాటు క్రీడల్లోనూ ప్రతిభ చూపాలని సూచించారు.ఈ కార్యక్రమంలో శిక్షణ పూర్తి చేసిన విద్యార్థులకు ఎల్లో – 9, ఆరెంజ్ – 14, గ్రీన్ – 3, బ్రౌన్ – 15, పర్పుల్ – 3 బెల్టులను ప్రదానం చేశారు. కార్యక్రమంలో కరాటే మాస్టర్ జె.వి. రమణ, ఆర్. సంతోష్, రిషికేష్ తదితరులు పాల్గొన్నారు.