నారాయణఖేడ్ మున్సిపల్ ఎన్నికల ఫలితాల్లో 8వ వార్డులో కాంగ్రెస్ అభ్యర్థి నాగేష్ కుమార్ షేట్కార్ 356 ఓట్ల భారీ మెజారిటీతో ఘన విజయం సాధించారు. సమీప బీఆర్ఎస్ అభ్యర్థిపై స్పష్టమైన ఆధిక్యంతో గెలుపొందిన ఈ ఫలితం స్థానిక రాజకీయాల్లో కీలకంగా మారింది. ఈ విజయంతో కాంగ్రెస్ శ్రేణుల్లో ఆనందం వెల్లివిరిసింది.ఫలితాలు వెలువడగానే కాంగ్రెస్ నాయకులు, కార్యకర్తలు, పార్టీ శ్రేణులు పెద్ద సంఖ్యలో చేరుకుని బాణసంచా కాల్చి, మిఠాయిలు పంచుకుంటూ సంబరాలు జరుపుకున్నారు. పట్టణంలో పండుగ వాతావరణం నెలకొంది. పార్టీ సీనియర్ నాయకులు, అభిమానులు నాగేష్ కుమార్ షేట్కార్‌ను అభినందిస్తూ శుభాకాంక్షలు తెలిపారు. కాబోయే చైర్మన్‌గా ఆయనపై విశ్వాసం వ్యక్తం చేశారు.విజయం అనంతరం నాగేష్ కుమార్ షేట్కార్ మాట్లాడుతూ, తనపై నమ్మకం ఉంచి గెలిపించిన ప్రతి ఓటరికి హృదయపూర్వక కృతజ్ఞతలు తెలిపారు. 8వ వార్డు అభివృద్ధి తన ప్రధాన లక్ష్యమని స్పష్టం చేశారు. తాగునీటి సమస్యలు, రహదారుల అభివృద్ధి, పారిశుధ్యం, వీధి దీపాలు వంటి ప్రాథమిక సౌకర్యాలపై ప్రత్యేక దృష్టి సారించి, దశలవారీగా సమస్యలను పరిష్కరిస్తానని హామీ ఇచ్చారు.ఎన్నికల సమయంలో ప్రజలకు ఇచ్చిన హామీలను తప్పకుండా అమలు చేస్తానని, ప్రజల సహకారంతో వార్డును ఆదర్శవంతంగా తీర్చిదిద్దేందుకు శక్తివంచన లేకుండా కృషి చేస్తానని పేర్కొన్నారు. ఈ విజయంతో కాంగ్రెస్ పార్టీకి మరింత బలం చేకూరిందని, ప్రజల విశ్వాసాన్ని నిలబెట్టుకునే విధంగా సేవాభావంతో ముందుకు సాగుతామని నాయకులు తెలిపారు.