వరంగల్ నగరంలోని కాశీబుగ్గలో ఒక విచిత్ర ఘటన వెలుగుచూసింది. ఇంటి పన్ను చెల్లించలేదనే కారణంతో మున్సిపల్ అధికారులు ఓ పేద మహిళ ఇంటి నుండి గ్యాస్ సిలిండర్‌ను తీసుకెళ్లడం స్థానికంగా చర్చనీయాంశంగా మారింది.

స్థానికంగా నివసిస్తున్న గొలుసుల సుజాత అనే మహిళకు గత నెల 23న ఇంటి పన్ను బకాయిలు చెల్లించాలని అధికారులు నోటీసులు జారీ చేశారు. అయితే ఆర్థిక ఇబ్బందుల కారణంగా తన వద్ద డబ్బులు లేకపోవడంతో సుజాత పన్ను చెల్లించలేకపోయింది.

దీంతో మున్సిపల్ సిబ్బంది ఆమె ఇంటికి వెళ్లి గ్యాస్ సిలిండర్‌ను స్వాధీనం చేసుకున్నారు. ఈ ఘటనతో సుజాత తీవ్ర ఆవేదనకు గురైంది. చివరకు చేసేది లేక అప్పు చేసి రూ.5,280 ఇంటి పన్నును చెల్లించింది.

పన్ను చెల్లించిన అనంతరం అదే రోజు సాయంత్రానికి అధికారులు గ్యాస్ సిలిండర్‌ను తిరిగి ఆమెకు అందజేశారు. ఈ ఘటనపై స్థానికులు తీవ్ర అసంతృప్తి వ్యక్తం చేస్తూ పేదలపై ఇలాంటి చర్యలు సరైనవికాదని విమర్శిస్తున్నారు.